2018-ci il dekabrın 15-də Xəzər Universiteti Psixologiya departamentinin müəllimi Nilufər Əlizadənin təşkilatçılığı ilə 4-cü kurs psixologiya tələbələri sosial layihə çərçivəsində Göyçay rayonu Səməd Vurğun adına internata səfər etdilər. Layihənin əsas məqsədi internatda yaşayan və təhsil alan uşaqların şəxsi inkişaflarına töhfə vermək –şəxsi bacarıqların fərqinə varmaq, məqsəd və hədəflərə doğru düzgün strategiya qurmaq, təfəkkür və fantaziyalarının inkişaf etdirmək idi. “Əlimdən tut” layihəsi çərçivəsində könüllü formada toplanmış 120-yə qədər şəxsi inkişaf, xarici və yerli ədəbiyyatlar, milli musiqi və mətbəxin təqdimatına və ingilis dilinin öyrənilməsinə aid kitablar, 100-ə qədər uşaqlar üçün intelektual jurnallar, bundan əlavə, oyuncaqlar, təfəkkürü inkişaf etdirəcək əl oyunları, rəngləmə albomları və digər hədiyyələr aparıldı.
Səfər boyunca tələbələrin layihənin hər mərhələsində həvəslə iştirak etməsi və təlim boyunca uşaqlarla müsbət kontakt qurması həm tələbələrin layihədə iştirak etmə və təşkilatçılıq bacarıqlarının işkişafı, həm də internatda təhsil, dünyada baş verən sürətli dəyişikliklərdən qismən uzaq qalan və bəlkə də, gələcək üçün xəyal qurmaqdan qorxan uşaqlar və yeniyetmələr üçün yeni ümid oldu.
Sonda Xəzər Universitetinin tələbələri Şaxta Baba və Qar qız obrazları ilə uşaqlara hədiyyələr verdilər, rəqs etdilər. Göyçay rayonu S.Vurğun adına internatın rəhbərliyi Xəzər Universitetinin bu təşəbbüsünü yüksək qiymətləndirərək, sonda öz təşəkkürlərini çatdırdılar.