2018-ci il dekabrın 15-də Bakının Sabunçu rayonunda yerləşən 72 nömrəli məktəb-liseydə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlının həyat və yaradıcılığına həsr edilmiş ədəbi-bədii gecə keçirildi. “Bir ömrün işığında” adlı görüşün məktəbin həyətində alimin ağac əkməsi ilə başlandı. Onun həyat və fəaliyyətindən bəhs edən sərgi maraqlı dizaynla qonaqların diqqətinə çatdırıldı. Məktəblə tanışlıqdan sonra başlanan tədbirdə alimin uşaqlıqdan indiyədək həyatının müxtəlif anlarını əhatə edirdi. Alimi görüş iştirakçılarına təqdim edən məktəbin direktoru Fərqanə Abbasova Professor Hamlet İsaxanlını ölkəmizin və xalqımızın milli-mənəvi dəyəri, sərvəti adlandırdı. Görüş Hamlet müəllimin şeirləri və şeirlərinə bəstələnmiş mahnıların ifası ilə rövnəqləndi. Daha sonra Hamlet İsaxanlı görüşdə iştirak edən şagird və müəllimlərin müxtəlif məzmunda suallarını cavablandırdı, özünün fəaliyyəti haqqında aparılan fikir mübadilələrində iştirak etdi. Alimin çıxışı, oxuduğu şeirləri çox böyük rəğbətlə qarşılandı. Görüşdə məktəbin şagird-müəllim-valideyn kollektivi, rayonun təhsil işçiləri, Xəzər Universiteti və “Dünya” məktəbinin əməkdaşları iştirak edirdilər.

Görüşün sonunda məktəbin şagirdlərindən birinin valideyni Hamlet İsaxanlıya olan sevgi və ehtiramının ifadəsi kimi özünün çəkdiyi alimin portretini ona təqdim etdi.