Azərbaycanın görkəmli pedaqoqu və yazıçı-publisisti, pedaqoji elmlər doktoru, əməkdar müəllim, Azərbaycan Təhsil Şurasının təsisçisi və sədri, Respublika Ağsaqqallar Şurası İdarə heyətinin üzvü, Azərbaycan Respublikası Prezidentinin fərdi təqaüdçüsü, “Xəzər Xəbər” yurnalı redaksiya heyətinin üzvü, professor Əjdər Ağayev 2018-ci il noyabrın 27-də 81 yaşında vəfat etmişdir.

Azərbaycan pedaqoji elminin ölkə hüdudlarından kənarda da tanınan simalarından olan Əjdər Ağayev milli pedaqogikanın inkişafında və çap etdirdiyi əsərlər vasitəsilə onun görkəmli nümayəndələrinin xarici ölkələrdə də tanıdılması sahəsində misilsiz xidmətlər göstərmişdir. 500-dən çox elmi əsərin, 40 kitabın, monoqrafiya və dərsliyin müəllifi olan Əjdər Ağayev Rusiya Sosial və Pedaqoji Elmlər Akademiysının həqiqi üzvü idi. Akademik Mehdi Mehdizadə adına mükafatın laureatıdır.

Əjdər Ağayev təhsil sahəsinin tanınmış təşkilatçısı və eksperti idi. Azərbaycan Respublikasında Təhsil Sahəsində İslahat Proqramını və Təhsil Haqqında Qanun layihəsini hazırlayan işçi qruplarının, Azərbaycan Respublikasının Prezidenti yanında Ali Attestasiya Komissiyasının Ekspert Şurasının üzvü, Təhsil Nazirliyi Elmi-Metodik Şurasının “Pedaqogika və psixologiya” bölməsinin sədri, “Ən yaxşı məktəb”, “Ən yaxşı müəllim” müsabiqə komissiyası təşkilat komitəsinin üzvü idi.

Əjdər Ağayev əmək fəaliyyəti boyu mətbuat təşkilatçısı və rəhbəri kimi də çalışmışdı. “Azərbaycan məktəbi” jurnalının və ona metodik əlavələrin baş redaktoru idi. Azərbaycan Təhsil Şurasının mətbu orqanı olan «Təhsil və zaman» qəzeti yarandığı gündən həyatının sonunadək onun baş redaktoru oldu.

Əjdər Ağayev bədii yaradıcılıqla da fəal məşğul olurdu. Azərbaycan Jurnalistlər Birliyinin və Azərbaycan Yazıçılar Birliyinin üzvü idi. Bədii əsərlərindən ibarət 10 kitabın müəllifi idi. Əsərləri rus, ingilis, Ukrayna, Belarus və başqırd dillərində çap olunmuşdur. Uşaqlar üçün yazdığı 100-dən artıq şeirə bəstəkarlar tərəfindən mahnı bəstələnmişdir. "Araz" ali ədəbi mükafatının laureatıdır.

Əjdər Ağayev Xəzər Universiteti və “Dünya” məktəbi ilə sıx əlaqədə idi. Universitet və məktəbdə mühazirə oxuyar, açıq dərs keçirər, çıxış edərdi. Məqalə və müsahibələrində ardıcıl olaraq Xəzər Universiteti və “Dünya” məktəbini yüksək dəyərləndirər, onları ölkənin təhsil sisteminə nümunə göstərirdi. “Xəzər Xəbər” jurnalının işində də dəyərli tövsiyələri ilə iştirak edirdi.

Əjdər Ağaevin əziz xatirəsi onu tanıyanların qəlbində daim yaşayacaq.

Allah rəhmət eləsin.

Xəzər Universiteti və “Dünya” məktəbinin kollektivləri