2018-ci il dekabrın 7-də Xəzər Universitetində Azərbaycanın tunc dövrü arxelogiyasına həsr edilmiş elmi seminar keçirildi. Elmi seminarda AMEA Arxeologiya və Etnoqrafiya İnstitutunun İctimaiyyətlə əlaqələr şöbəsinin rəhbəri, arxeoloq Pərviz Qasımov “Tunc dövrü kurqan tipli dəfn abidələri” mövzusunda elmi məruzə ilə çıxış etdi.

P.Qasımov keçmiş sovet və Şərqi Avropa ölkələrində geniş yayılmış “kurqan” termininin elmi ədəbiyyatda semantikası və etimologiyası ilə bağlı məsələlər, Şimali Azərbaycan ərazisində son xalkolit dövrü Leylatəpə mədəniyyəti çərçivəsində Şimali Avrasiya ilə müqayisədə kurqan tipli qəbir abidələrinin daha erkən genezisi, kurqanların yaranmasının rasional və irrasional səbəbləri, kurqanların sosial marker kimi qəbul edilməsi ilə bağlı elmdə mövcud nəzəriyyələr barədə söz açdı. Daha sonra mühazirəçi Şimali Azərbaycan ərzisində ilk, orta və son tunc dövrü kurqan tipli qəbir abiələrinin konstruktiv xüsusiyyətlərindən, dövrü və regional özünəməxsus cəhətləri barədə ətraflı məlumat verdi.

Elektron təsvirlərlə müşayiət olunan mühazirədən sonra P.Qasımov tədbir iştirakçılarının çoxsaylı suallarını cavablandırdı.