2018-ci il dekabrın 7-də Xəzər Universitetinin “Mərmər” zalında Humanitar və Sosial Elmlər fakültəsinin 1-ci il tələbələri ilə universitetin rektoru Dr. Hassan Niknafs, fakültə dekanı dosent Cabir Xəlilov, dekanlıq heyəti və fakültənin departament müdirləri arasında görüş keçirildi. Tədbirdə ilk olaraq, Dr. Hassan Niknafs çıxış edərək, tələbələrə dərslərə məsuliyyətli yanaşmalarını, nizam-intizam qaydalarına ciddi riayət etmələrini tövsiyə etdi. Çıxışının sonunda əvvəlki illərin uğurlu məzunlarından misal gətirən rektor Dr. Hassan Niknafs tələbələri gələcək uğurlara səslədi.

Görüşdə Azərbaycan Respublikasının Prezidenti yanında Gənclər Fondu, Brüsseldə Avropa Parlamentinə təcrübə səfəri ilə bağlı elan edilmiş müsabiqənin qalibləri – Humanitar və Sosial Elmlər fakültəsinin 2-ci il regionşünaslıq ixtisası magistr tələbəsi Aygün Əliyeva və 4-cü il politologiya ixtisası bakalavr tələbəsi Minəxanım Səlimova da iştirak edirdilər. Onlar 201 nəfər arasında keçirilmiş müsabiqədən uğurla keçən təcrübə səfərində iştirak hüququ qazanan 20 gəncin sırasına daxil olmuşlar. Hər iki tələbə 1-ci il tələbələrinin qarşısında rektor tərəfindən uğurlarına görə təntənəli şəkildə təşəkkürnamə ilə təltif edildilər.

Daha sonra söz alan Humanitar və Sosial Elmlər fakültəsinin dekanı dosent Cabir Xəlilov tələbələrin problemləri və final imtahanları öncəsi sualları ilə maraqlandı, onların suallarını cavablandırdı.