2018-ci il noyabrın 25-də Xəzər Universiteti İqtisadiyyat və Menecment fakültəsi və Milli Mühasiblər Forumunun birgə əməkdaşlığı ilə Xəzər Universitetinin şəhər mərkəzində yerləşən korpusundakı Fikrət Əmirov Konfrans-Konsert mərkəzində “Maya dəyərinin uçotu və pul vəsaitlərinin hərəkəti haqqında hesabat” mövzusunda növbəti seminar keçirildi. Seminarda mühasibat uçotu sahəsinin tanınmış mütəxəssisləri ilə yanaşı, Xəzər Universitetinin bakalavr və MBA tələbələri və Bakı Mühəndislik Universitetinin tələbələri də iştirak edirdilər.
Xəzər Universitetinin İqtisadiyyat və Menecment fakültəsinin müəllimi Dr. Elsevər İbadov iştirakçıları salamladı, universitetin fəaliyyəti haqqında danışaraq, universitetin bakalavriatura və magistratura pillələrində tədrisin keyfiyyəti haqqında ətraflı məlumat verdi və mühasibat uçotu ixtisaslarının beynəlxalq təhsil standartlarına uyğun aparıldığını vurğuladı. Çıxışdan sonra Xəzər Universitetinin tanıtım filmi izləndi.
Daha sonra Milli Mühasiblər Forumunun Təşkilat Komitəsinin sədri Dr. Ruslan Atakişiyev forumun fəaliyyət prinsipləri və tədbirin keçirilməsi məqsədi barəsində iştirakçıları məlumatlandırdı. Sonra Xəzər Universitetinin İqtisadiyyat və menecment departamentinin müəllimi Dr. Elsevər İbadov “Pul vəsaitlərinin hərəkəti haqqında hesabat” mövzusunda geniş təqdimat etdi və iştirakçıların suallarını cavablandırdı. İqtisadi Araşdırmalar və Tədris Mərkəzinin vitse-prezidenti Radil Fətullayev və Cahan Holdinqin Maliyyə meneceri Elvin Həsənov “Maya dəyərinin hesablanması və hesablama metodları” haqqında geniş məlumat verdilər və mövzunu praktiki nümunələr əsasında izah etdilər. Seminarın davamında “Professional mühasib” jurnalının baş redaktoru Mehdi Babayev isə “Vergi məcəlləsində tanınan xərclər və dəyişikliklər” haqqında geniş məlumat verdi, mövcud praktik problemlər mövzusunda çıxış etdi.
Seminarın sonunda iştirakçıları maraqlandıran suallar cavablandırıldı, mövzular ətrafında müzakirələr aparıldı və iştirakçılara sertifikatlar təqdim edildi.
Qeyd edək ki, Milli Mühasiblər Forumunun növbəti seminarlarının da Xəzər Universitetinin əməkdaşlığı ilə keçirilməsi planlaşdırılır.