2018-ci il noyabrın 20-də Xəzər Universitetinin Mərmər salonunda Zərdab məktəbliləri ilə görüş keçirildi. Görüşdə “Zərdabi yolu” Hazırlıq Mərkəzinin 80 nəfərərədək dinləyicisi, mərkəzin rəhbərliyi və müəllimləri, Xəzər Universitetinin rəhbərliyi, dekanlar və departament müdirləri, əməkdaşlar iştirak edirdilər.

Universitetə tələbə cəlbi üzrə qurumun təşkil etdiyi növbəti görüşdən məqsəd bir müddət sonra abituriyent olacaq məktəbliləri universitetlə tanış etmək, ali təhsil müəssisəsi və ixtisas seçimində onlara faydalı tövsiyələr vermək idi.

Görüşü universitetin İctimai əlaqələr və media üzrə direktoru Əlövsət Əmirbəyli açaraq, iştirakçıları salamladı, görüşün məqsədini onlara izah etdi.

Xəzər Universitetinin rektoru Dr. Hassan Niknafs çıxışında universitet haqqında geniş məlumat verdi. Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı geniş çıxış edərək, məktəblli gənclərə həyatlarının ali məktəbə qəbul kimi ən məsul dövrünə aid tövsiyələrini bildirdi.

Sonra universitet haqqında qısa film nümayiş etdirildi. Universitetə tələbə cəlbi üzrə qurumun koordinatoru professor Fuat Rəsulov slayd-şoular vasitəsilə universitetin həm dövlət sektorunda, həm də özəl sektorda məsul və rəhbər vəzifələr tutan məzunları, universitetdəki qurumlar və ixtisaslar haqqında ətraflı məlumat verdi. “Zərdabi yolu” Hazırlıq Mərkəzinin direktoru Natiq Eyvazov çıxışında görüşün məktəblilər üçün faydalı olacağına əminliyini və tədbirin təşkilinə görə Xəzər Universitetinin rəhbərliyinə və əməkdaşlarına təşəkkürünü bildirdi.

Universitetin Humanitar və Sosial Elmlər fakültəsinin dekan müavini, Xəzər Psixoloji Xidmət mərkəzinin direktoru Mələk Kərimova məktəblilər üçün psixoloji seminar keçirdi.

Sonra məktəblilər maraqları üzrə universitet dekanlıqlarının Mərmər salonda təşkil olunmuş guşələrində onları maraqlandıran suallara ətraflı cavablar aldılar, Kitabxana-informasiya mərkəzində, laboratoriyalarda oldular.

Məktəblilər üçün Bakı şəhərinə gəzinti də təşkil olundu.