2018-ci il noyabrın 8-də Xəzər Universitetinin İqtisadiyyat və menecment fakültəsinin I kurs “A” qrupu ilə Azərbaycan tarixi fənni üzrə növbəti dərs “Şirvanşahlar irsi dünya muzeylərində” sərgisində keçirildi.

Milli Azərbaycan Tarixi Muzeyinin əməkdaşları İnarə Muradəliyeva, Nərmin Bağırova və Ramiyə İsmayılova “İçərişəhər” Dövlət Tarix-Memarlıq Qoruğu İdarəsi tərəfindən Şirvanşahlar Saray Kompleksində təşkil olunmuş sərgi haqqında tələbələrə məlumat verdilər. Sərgidə Milli Azərbaycan Tarixi Muzeyi, Azərbaycan Milli İncəsənət Muzeyi, Arxeologiya Muzeyi, Şamaxı Tarix-Diyarşünaslıq Muzeylərinin kolleksiyalarından 100-dən artıq eksponat göstərilir. Həmçinin, sərginin əsas eksponatlarını İstanbul Əskəri Muzeyi tərəfindən təqdim olunan maddi-mədəniyyət nümunələri təşkil edir. Şirvan hökmdarı Fərrux Yasara aid 4 dəbilqə, Şirvanşah Keyqubad və Şirvanşah I Xəlilullaha aid zirehli köynəklər 500 ildən sonra yenidən Azərbaycana gətirilmişdir. Həmçinin, Gürcüstan Milli Muzeyindən gətirilən Pir Hüseyn xanəgahına məxsus kaşı nümunələri də burada nümayiş olunur.

Tələbələrin xüsusi marağını cəlb edən məqamlardan biri sərgidə müxtəlif və çoxsaylı müasir texnoloji avadanlıq və interaktiv vasitələrdən istifadə edilməsidir. Bunlar sırasında interaktiv masalar, holoqrafik vitrinlər, 3D qrafikalı filmlər, audio və vizual effektlər xüsusi qeyd edilməlidir. Tələbələrə bildirildi ki, sərginin təşklində Xəzər Universiteti Tarix və arxeologiya departamentinin müəllimi t.ü.f.d. dosent Səbuhi Əhmədov yaxından iştirak etmişdir.