2018-ci il noyabrın 15-də Xəzər Universitetinin beynəlxalq tələbələri milli televiziya kanalı AzTV-nin “Tələbə dünyası” verilişi üçün verdikləri müsahibə Beynəlxalq tələbə gününə həsr olunmuş proqramda yayımlandı.
Verlişdə Mavritaniyadan Ali Mohamed, Zimbabvedən Tendai Samanta Şereni, Ekvadordan Sergio Omar Saca Quipe və Luiz Omar Andrade Bravo Azərbaycan və Xəzər Universiteti ilə bağlı təcrübələrini tamaşaçılarla bölüşərək, buradakı tələbə həyatı və təhsillə bağlı təəsüratlarını dilə gətirdilər.
Qeyd edək ki, Ali Mohamed Xəzər Universitetinin magistratura pilləsində beynəlxalq münasibətlər üzrə təhsil alır. O, Xarici İşlər Nazirliyinin AIDA (Azərbaycan Beynəlxalq İnkişaf Agentliyi) qurumu tərəfindən həyata keçirilən İslam Əməkdaşlıq Təşkilatına üzv ölkələrin vətəndaşları üçün təhsil qrantları proqramının iştirakçısıdır. Təqaüd proqramı təhsil haqqı, həmçinin, yaşayış, nəqliyyat və tibbi sığorta xərclərini qarşılayır. Magistratura pilləsindən olan digər tələbələr, Sergio və Omar Xəzər Universitetində neft-qaz mühəndisliyi ixtisasında təhsil alırlar. Onlar Xəzər Universitetinin beynəlxalq təqaüd proqramına layiq görülmüşlər ki, bu təqaüd proqramı yüksək akademik göstəricilər nümayiş etdirən tələbələrə təklif olunur.
Xəzər Universitetində Tendainin artıq üçüncü ilidir. Tendai bakalavr pilləsində Beynəlxalq münasibətlər ixtisası üzrə təhsil alır. O da Xəzər Universitetinin Beynəlxalq Təqaüd Proqramına layiq görülən tələbələrdəndir. Azərbaycanda olduğu müddətdə Tendai Azərbaycanın təbiəti və mədəniyyəti ilə daha yaxından tanış olmaq üçün regionlara da səfərlər etmişdir.