2018-ci il noyabrın 2-də EuropeAid-in “Tədqiqat sahəsinin inkişafı və innovasiyanın gücləndirilməsi” üzrə nümayəndələri Xəzər Universitetini ziyarət etdilər. Polşadan olan nümayəndələr –Yaçek Qayevski və Kriştof Quldanın məqsədi Xəzər Universitetində tədqiqat, inkişaf və innovasiya (Tİİ) fəaliyyəti haqqında daha çox məlumat əldə etmək, həmçinin, EuropeAid çərçivəsində başlamış yeni “Azərbaycanın ali təhsil ocaqlarında tədqiqat sahəsinin inkişafı və innovasiyanın gücləndirilməsi” layihəsini təqdim etmək idi.
Görüşdə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, universitetin rektoru Dr. Hassan Niknafs, Elmi işlər üzrə prorektor dosent İradə Xəlilova, Kitabxana-İnformasiya Mərkəzinin Direktoru Tatyana Zaytseva, o cümlədən, İnkişaf Mərkəzinin Direktoru Raziyə İsayeva iştirak edirdilər. Görüş zamanı, prorektor İradə Xəlilova Xəzər Universitetində Tİİ fəaliyyəti, qeyd olunan sahələr üzrə qarşıda duran hədəf və çətinliklər haqqında ətraflı təqdimatla çıxış etdi.
Görüşün sonunda tərəflər həmkarlıqda maraqlı olduqlarını ifadə edərək, layihə çərçivəsində gələcək əməkdaşlıq addımlarını müəyyənləşdirdilər.
Layihənin məqsədi ali təhsil ocaqlarında Tİİ-ni dəstəkləmək üçün rəqabətədavamlı tədqiqat fondlarının müxtəlifliyini uğurla tətbiq etmək və həyata keçirməklə, Təhsil Nazirliyinin institusional potensialını artırmaq və beləliklə, Tİİ siyasəti və idarəçiliyini gücləndirməkdir.