2018-ci il oktyabrın 21-də Xəzər Universiteti İqtisadiyyat və menecment fakultəsinin I kurs tələbələri “Tarixi obyekt əsasında turizm obyektinin yaradılması” mövzusunda təqdimatlar hazırlamışlar. Universitetin Tarix və arxeologiya departamentinin müəllimi t.ü.f.d. Səbuhi Əhmədov tərəfindən Azərbaycanın Orta əsr unikal abidəsi olan Ramanı qalasının turizm obyektinə çevrilməsinin yollarının axtarılıb tapılması, müvafiq layihənin tərtib edilməsi təklif edilmişdir. Tələbələr burada turistik infrastrukturun, muzey ekspozisiyasının yaradılması, obyektin maddi-təminat məsələləri və onların həlli yolları, təbliğat –PR kampaniyası ilə bağlı öz təklif və ideyalarını təqdim etmişdilər.
Prezentasiyanı təqdim edən hər tələbə ümumi məqamlarla bərabər bəzi işlərin görülməsini xüsusi vurğulamışdır. Kənan İsmayılov abidəyə xüsusi nəqliyyatın, bu baxımdan servisin təşkilinin vacibliyini qeyd etmişdir. Abidədə olaraq onun vəziyyətini əks etdirən fotoşəkillər çəkmiş İsayeva Aytən və Fatimə Vəlizadə abidədə bərpa işlərinin aparılmasını, bələdçinin peşəkar səviyyədə hazırlanmasını təklif etməklə bərabər burada “Ford Bayard” tipli şounun keçirilməsini və bununla da qalaya diqqətin cəlb edilməsini göstərmişlər. Səfərəliyev Ceyhun və Zülfüqarov Pərviz abidədə olaraq ətrafda park salınmasının vacibliyini vurğulamış, qalada hərb tarixinə aid ekspozisiyanın qurulmasını təklif etmişlər. Ceyhun və Pərviz sosial şəbəkələr və saytlat vasitəsilə xaricilərin qala ilə bağlı təəsüratları ilə də maraqlanmışlar. Ramil Sayidov qalanın reklam edilməsinin vacibliyini vurğulayaraq xüsusi promorolikin hazırlanmasını, ayrıca PR kampaniyasının təşkilini diqqətə çatdırmışdır.
Elçin Həmidov qalanın Azərbaycan kinofilmləri üçün çəkiliş meydançası kimi istifadə olunmasını nəzərə alaraq burada müvafiq stendlərin qurulmasını göstərmişdir. Gülnar Qasımlı qalanın daxili məkanının darlığını nəzərə alaraq burada virtual reallıq 3D eynəklərindən geniş istifadə edilməsini təklif etmişdir. Nərmin Rəsulova qalada və ya onun yaxınlığında kiçik milli üslublu restoranın təşkil edilməsini cəlbedici məqam kimi göstərmişdir. Rüfət Şirvanlı və Mehti Qəmbərov qalanın hündürlükdə yerləşməsini nəzərə alaraq yaxınlıqda qədimi üslubda otelin inşa edilməsini, həmçinin qalanın qarşısında orta əsr üslubunda hazırlanmış suvenirlər bazarının təşkil edilməsini təklif etmişlər