2018-ci il oktyabrın 27-də Mirzə Fətəli Axundzadə adına Azərbaycan Milli Kitabxanasında Xəzər Universitetinin müəllimi, tanınmış şair Qardaşxan Əzizxanlının 60 illik yubileyi münasibətilə nəşr olunmuş “İlkim də sən, indim də sən, sonum sən” adlı şeirlər kitabının təqdimatı və “İmza günü” keçirildi.
Azərbaycan Yazıçılar Birliyi və Milli Kitabxana tərəfindən birgə təşkil edilən tədbirdə iştirakçılar əvvəlcə yubilyarın yaradıcılığına dair “Qardaşxan Əzizxanlı-60” adlı sərgi ilə tanış oldular. Sərgidə Milli Kitabxananın fondunda olan şairin müəllifliyi, redaktorluğu, layihə rəhbəri olduğu kitablar və mətbuat materialları sərgilənmişdi.
Tədbirdə Milli Məclisin deputatı professor Musa Qasımlı, filologiya elmləri doktoru Rüstəm Kamal, tarix elmləri üzrə fəlsəfə doktoru Lətif Şüküroğlu, şair-kinodramaturq İlqar Fəhmi, şairlərdən Əjdər Ol, Şahin Musaoğlu, Xanəmir, Yusif Savalan, həmçinin, Qarabağ müharibəsi veteranı İlham İsmayıl Qardaşxan Əzizxanlının yaradıcılığı haqqında danışdılar.
Mərasimdə Xəzər Universitetinin tələbələri Aytən Əsgərova, Ayşən Mustafalı, Səidə Cabarova, Aytac Həsənova, Pinar Məmmədzadə, Nəzrin İsmayıllı, Səkinə Ələkbərova və “Zəkalar” liseyinin şagirdləri Aydan Mehdiyeva, Nəzrin Ağazadə, Şəbnəm Haşımlı, Fateh Şıxlar, Nilufər Tağıyeva, Aydan Paşa, Nizami rayon 12 saylı tam orta məktəbin V sinif şagirdi İbrahim Əhmədov ədəbi-bədii kompozisiya ilə çıxış edirdilər.
Təqdimat mərasimində Qardaşxan Əzizxanlı kitab barədə fikirlərini bölüşdü, tədbirin təşkilatçılarına və iştirakçılarına təşəkkürünü bildirdi.
Sonda Əhməd Cavad və Üzeyir Hacıbəyov sənətinin möhtəşəm nümunəsi olan "Çırpınırdı Qara dəniz" mahnısının tədbir iştirakçıları tərəfindən hamılıqla oxunması tədbirə əzəmət verməklə xüsusi məna və məzmun bəxş edib.
Tədbir barədə daha geniş məlumatı bu linklər vasitəsilə əldə etmək olar: