2018-ci il oktyabrın 26-da Xəzər Universitetinin “Neftçilər” kampusunda Fulbright qonaq tədqiqatçıları üçün qarşılama mərasimi təşkil edildi. Tədbirin məqsədi Fulbright qonaq tədqiqatçılarını Xəzər Universitetinin heyətinə təqdim etmək idi.
Hazırda payız semestrində Şərqi Kentuki Ştatının Təhsil Kollecinin keçmiş professoru Dr. Qaisar Sultana Xəzər Universitetinin qonaq tədqiqatçısıdır. Dr. Qaisar Sultana xüsusi təhsil sahəsində böyük təcrübəyə malikdir. Proqram çərçivəsində o, müxtəlif fənlərdən dərs deməklə yanaşı, Xəzər Universitetinin İnkişaf Mərkəzində təlimçi kimi də fəaliyyət göstərir.
Tədbirdə, eyni zamanda, Dr. Nadeem Fazal və Dr. Nabil Al-Tikriti də iştirak etdilər. Azərbaycan Tibb Universitetində tədqiqat aparan Dr. Nadeem Fazal, eyni zamanda, Xəzər Universitetinin doktorantları üçün akademik məqalə və tədqiqat sahəsində seminarlar da aparır. Mary Washington Universitetinin dosenti Dr. Nabil Al-Tikriti isə payız semestrini Bakı Dövlət Universitetində keçirəcək.
Tədbirdə qonaq tədqiqatçılar qısa nitq söylədilər. Musiqi və incəsənət departamentinin müdiri Zülfiyyə Sadıqova pianoda konsert proqramı ilə çıxış etdi. Qonaqlar üçün çay süfrəsi açıldı.
Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı da tədbirdə iştirak edirdi.
ABŞ Dövlət Departamentinin Təhsil və Mədəniyyət İşləri Bürosunun proqramı olan Fulbright təqaüd proqramı, ABŞ-ın Bakıdakı səfirliyi tərəfindən idarə olunur.