2018-ci il oktyabrın 26-da Xəzər Universitetinin Mərmər salonunda universitetin Potensial məktəb direktorları kursunun 8 və 9-cu buraxılışına həsr olunmuş təntənəli mərasim keçirildi. Mərasimdə universitetin rəhbərliyi, əməkdaşları və tələbələri, kursun məzunları və qonaqlar iştirak edirdilər. Xəzər Universiteti himninin ifası ilə başlanan mərasimdə sonra iştirakçılara universitetin Kamera orkestrinin (bədii rəhbər universitetin Musiqi və incəsənət departamentinin müdiri, Əməkdar müəllim, pianoçu dos. Zülfiyyə Sadıqova) Azərbaycan və dünya bəstəkarlarının əsərlərindən ibarət konsert təqdim olundu.
Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı geniş nitq söyləyərək, müasir dövrdə qloballaşan dünyada təhsilin, o cümlədən Azərbaycan təhsilinin qarşısında duran mühüm vəzifələrdən, bu vəzifələri uğurla yerinə yetirmək üçün məzunların üç ay ərzində kursda əldə etdikləri idarəetmə bilikəri və təcrübəsinin əhəmiyyətindən danışdı, tövsiyələrini verdi və onlara uğurlu karyera arzu etdi.
Sonra məzunlara “Peşəkar İnkişaf Sertifikatı”nın təqdim olunmasına başlanıldı. Sertifikatları professor Hamlet İsaxanlı, İdarəetmə və tələbə işləri üzrə prorektor İsaxan İsaxanlı, Elmi işlər üzrə prorektor dos. İradə Xəlilova, Təhsil fakültəsinin dekanı dos. Elza Səmədova, İnkişaf mərkəzinin direktoru Raziyə İsayeva və kursu tədris edən müəllimlər təqdim etdilər. Xatirə şəkilləri çəkildi.
Məzunlar adından Ruhiyyə İmanova və Lalə Nağılı çıxış edərək, kursun və tədrisin yüksək səviyyədə təşkilinə görə universitet rəhbərliyinə, kursun təşkilatçılarına və müəllimlərə minnətdarlıqlarını, qazandıqları idarəetmə bacarıq və vərdişlərinin karyeralarında önəmli rol oynayacağını bildirdilər. Kursun keçmiş məzunu – 72 saylı məktəbin direktoru Fərqanə Abbasova kursda əxz etdiyi biliklərin praktik işində ona böyük yardım göstərdiyindən danışdı.
Kursun məşğələlərindən çəkilmiş fotolardan ibarət slayd-şou nümayiş etdirildi. Universitetin rəqs qrupu gözəl çıxışı ilə məzunları təbrik etdi. Məzunların xahişi ilə şair Hamlet İsaxanlı “Yaşamağa nə var ki...” adlı şeirini söylədi.
Potensial məktəb direktorları kursu 2014-cü ildən fəaliyyətə başlayıb, 600 nəfərdən çox məzuna sertifikat vermişdir, onlardan 50 nəfərdən çoxu direktor, direktor müavini təyin olunmuşdur.