2018-ci il oktyabrın 21-də Xəzər Universiteti İqtisadiyyat və Menecment fakültəsi və Milli Mühasiblər Forumunun birgə əməkdaşlığı ilə Xəzər Universitetinin şəhər mərkəzində yerləşən korpusundakı Fikrət Əmirov Konfrans-Konsert mərkəzində növbəti seminar keçirildi. Seminarda mühasibat uçotu sahəsinin tanınmış mütəxəssisləri iştirak edirdilər.

Xəzər Universitetinin İqtisadiyyat və Menecment fakültəsinin dekanı Dr.Ceyhun Məmmədov iştirakçıları salamladı, universitetin fəaliyyəti haqqında danışaraq, universitetin bakalavriatura və magistratura pillələrində tədrisin keyfiyyəti haqqında ətraflı məlumat verdi və mühasibat uçotu ixtisaslarının beynəlxalq təhsil standartlarına uyğun aparıldığını vurğuladı. Çıxışdan sonra Xəzər Universitetinin tanıtım filmi izləndi.

Daha sonra Milli Mühasiblər Forumunun Təşkilat Komitəsinin sədri Dr. Ruslan Atakişiyev Forumun fəaliyyət prinsipləri və tədbirin keçirilməsi məqsədi barəsində iştirakçıları məlumatlandırdı. Sonra Vergilər Nazirliyinin əməkdaşı Mirəli Kazımov “2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”na uyğun olaraq, Sadələşdirilmiş vergi sisteminin tədricən ƏDV sistemi ilə əvəzlənməsi və ƏDV dərəcəsinin diferensiallaşdırılması məsələsinə ətraflı münasibət bildirdi. İqtisadi Araşdırmalar və Tədris Mərkəzinin vitse-prezidenti Radil Fətullayev isə xərclər və məsrəflər üzrə maliyyə uçotunda ikili yazılışların verilməsi haqqında praktiki nümunələri izah etdi. Seminarın davamında “Professional mühasib” jurnalının baş redaktoru Mehdi Babayev “Mənfəət vergisi bəyannaməsinin xərc hissəsinin tərtib olunmasında yaranan praktik problemlər, uyğunsuzluq yaradan məqamlar və onların həlli yolları” və UNEC maliyyə və mühasibat fakültəsinin müəllimi Abdulkərim Sadıqov isə “Xərclərin maliyyə uçotunda standartlar üzrə adlı təsnifləşdirilməsi və bölünməsi, istehsalın (işin, xidmətin) maya dəyərinə məsrəflərin ötürülməsi və bu sahədə mövcud praktik problemlər” mövzusunda çıxış etdilər.

Seminarın sonunda iştirakçıları maraqlandıran suallar cavablandırıldı, mövzular ətrafında müzakirələr aparıldı və iştirakçılara sertifikatlar təqdim edildi.

Qeyd edək ki, Milli Mühasiblər Forumu seminarın 2018-ci ilin noyabrında yenidən Xəzər Universitetinin əməkdaşlığı və ev sahibliyi ilə keçirilməsi planlaşdırılır.