Xəzər Universiteti Tarix və arxeologiya departamentinin müəllimi t.ü.f.d., dosent Səbuhi Əhmədovun həmmüəllifliyi ilə “Azərbaycanın qədim və orta əsr silahları” adlı kitab-albom çap edilmişdir. Nəşrin elmi redaktoru Milli Azərbaycan Tarixi Muzeyinin direktoru akademik Nailə Vəlixanlı, koordinatoru t.ü.f.d. Nasir Quluzadə, həmmüəllifər t.ü.f.d. S.Əhmədov, E.Məmmədov və N.Qarayevadır. Kitabda Milli Azərbaycan Tarixi Muzeyinin arxeoloji kolleksiyasında qorunan bəzi silah nümunələri haqqında müfəssəl məlumat verilmişdir. Həmin nümunələrin bir qismi Şəki, Qazax, Qəbələ və Mingəçevir bölgələrinə, eləcə də, Xəzər dənizi hövzəsinə təşkil edilmiş arxeoloji ekspedisiyaların tapıntılarıdır. Bundan başqa, kitab-albomda Daşkəsən, Lənkəran, Qazax, Naxçıvan və Azərbaycanın digər bölgələrində təsadüfi tapılmış silahlar haqqında da məlumat verilmişdir. Ümumilikdə, kitab-albomda 82 ədəd arxeoloji tapıntı işıqlandırılmışdır.