2018-ci il oktyabrın 11-i və 12-də Türkiyənin İstanbul şəhərində dünyanın ilk yüz düşüncə quruluşu arasında yer alan TESAM və Mərmərə Universitetinin birgə təşkilatçılığı ilə “Türkiyə – Türk dünyası əlaqələrinin dünəni, bu günü və sabahı” mövzusunda beynəlxalq konfrans keçirildi.

Konfransda müxtəlif ölkələrdən və Türkiyənin fərqli universitetlərindən gələn otuza yaxın nüfuzlu elm adamının məruzələri dinlənildi. İstanbuldakı konfransda Azərbaycanı Xəzər Universitetinin Tarix və arxeologiya departamentinin müəllimi Dr. Telman Quliyev (Nüsrətoğlu) təmsil edirdi. O, XX əsr Türkiyə-Azərbaycan münasibətlərinin tarixi və Qafqaz İslam Ordusu haqqında geniş məruzə ilə çıxış etdi. Tədbir əsnasında Telman Nüsrətoğlunun mövzu ilə əlaqədar Türkiyə televiziyalarına verdiyi müsahibələr də yayınlandı.