2018-ci oktyabrın 6-da Xəzər Universiteti Tarix və arxeologiya departamentinin müdiri Roza Arazovanın dəstəyi və departamentin müəllimi Orxan Zamanovun təşəbbüsü ilə Təhsil fakültəsinin müəllim və tələbə heyəti xüsusi ayrılmış nəqliyyatla Azərbaycanın və dünyanın nadir tarixi-mədəniyyət abidə kompleksi olan Qobustana yollandı. Səfərdə Xəzər Universitetinin Təhsil fakültəsinin dekanı Elza Səmədli də iştirak edirdi.

Səfərin məqsədi universitetin birinci və ikinci kurs tarix müəllimliyi ixtisasının tələbələrinin tarixi bilikləri və Azərbaycanın maddi-mədəni irsi ilə bilavasitə tanışlığını təmin etmək idi. 

Xəzər Universitetinin tələbələrinə Böyükdaş dağında qədim mağaralar, qayaüstü təsvirlər, landşaftın özünəməxsusluğu, ibtidai insanın ocaq və yaşayış yeri göstərildi. Daha sonra isə xüsusi olaraq yeni yaradılmış interaktiv muzeydə bələdçi tərəfində dünya və Azərbaycanın petroqlifləri, onların öyrənilməsi və coğrafiyası, bölgənin qədim iqlimi və landşaftı, fauna və florası, ibtidai insanın fəaliyyəti və yaşamı haqqında geniş ekskursiya təşkil olundu. Böyük maraq ilə qarşılanan səfər qısa istirahət saatı və əyləncəli oyunlar ilə başa çatdı.