2018-ci il oktyabrın 5-də Xəzər Universiteti Erasmus+ PAWER layihəsi çərçivəsində bir günlük regional konfrans keçirildi. Konfransda Azərbaycan Respublikası Təhsil Nazirliyi, Xəzər Universiteti, Bakı Mühəndislik Universiteti, Gürcüstanın İlia Cavcavadze adına Dövlət Universiteti, Akaki Tsereteli Dövlət Universiteti, Batumi Dövlət Universiteti və Gürcüstan Respublikasının Təhsil, Elm, İdman və Mədəniyyət Nazirliyinin nümayəndələri iştirak edirdilər.

Konfrans öz işinə səhər saat 10:00-da layihə tərəfdaşlarının daxili görüşü ilə başlamışdır. Görüşdə layihənin tərəfdaşları olan Xəzər Universiteti, Bakı Mühəndislik Universiteti, Gürcüstanın universitetləri ilə yanaşı, Azərbaycan Dillər Universiteti və Naxçıvan Dövlət Universitetinin nümayəndələrinin də iştirakı ilə tələbələrin Erasmus+ layihələri və digər layihələr çərçivəsində mobilliyi, onların mübadiləyə getdikləri universitetlərdə topladığı kreditlərin tanınması məsələləri müzakirə olundu.

Konfransın rəsmi açılış mərasimi saat 14:00-da universitetin “Mərmər” zalında baş tutmuşdur. Konfransı açılış sözü ilə başlayan Dr. Hassan Niknafsdan sonra qonaqları salamlayan Azərbaycan Təhsil Nazirliyinin rəsmisi dos. Şahin Bayramov PAWER layihəsinin Azərbaycan universitetləri üçün vacibliyindən və aktuallığından danışdı. Tədbir təqdimatçıların çıxışları ilə davam etdi və qoyulan məsələlər geniş müzakirə olundu.

Qeyd edək ki, tədbir layihədə həyata keçirilmiş işlərin geniş ictimaiyyətə çatdırılması məqsədini daşıyır.