2018-ci il oktyabrın 3-də Xəzər Universitetinin rektoru Dr. Hassan Niknafsın sədrliyi ilə Elmi Şuranın yeni dərs ilində ilk iclası oldu. İclası giriş sözü ilə açan rektor Hassan Niknafs yeni dərs ilində Elmi Şuranın ilk iclasının keçirildiyini və iclasda Eımi Şuranın 4 yeni üzvünun də iştirak etdiyini nəzərə çatdırdı. Yeni üzvlər –Kitabxana-İnformasiya Mərkəzinin direktoru Tatyana Zaytseva, Təmir-tikinti işləri üzrə menecer Şahin İsayev, Mühəndislik və Tətbiqi Elmlər fakültəsinin dekan müavini Fəxrəndə Əlimərdanova və İqtisadiyyat və Menecment fakültəsinin dekan müavini Şəhriyar Muxtarov Elmi Şura üzvlərinə təqdim olundular.

İclasın gündəliyinə uyğun olaraq, Humanitar və Sosial Elmlər fakültəsinin dekanı Cabir Xəlilov, İqtisadiyyat və Menecment fakültəsinin dekanı Ceyhun Məmmədov, Təhsil fakültəsinin dekanı Elza Səmədli və Mühəndislik və Tətbiqi Elmlər fakültəsinin dekan müavini Fəxrəndə Əlimərdanova məzunlar haqqında məlumat verdilər.

Doktorant və dissertantların dissertasiya mövzusu, elmi rəhbərlərinin təsdiqi və ixtisaslarının dəyişdirilməsi haqqında Magistratura, doktorantura və elmi işlər bölməsinin müdiri Eldar Şahgəldiyevin məlumatları dinlənildikdən sonra doktorant və dissertantlar çıxış edərək, öz tədqiqat işləri ilə bağlı ətraflı məlumat verdilər, Elmi Şura üzvlərinin suallarını cavablandırdılar. Daha sonra Humanitar və Sosial Elmlər fakültəsinin dekanı Cabir Xəlilovun dərs vəsaitlərinin və fənn proqramlarının çapa təqdim olunması haqqında məlumatları dinlənildi. Məsələ ilə bağlı çıxış edən Dillər və mədəniyyətlər departamentinin koordinatotu Zivər Hüseynli-Baylan və Psixologiya departamentinin koordinatoru Mələk Kərimova çap üçün nəzərdə tutulan dərs vəsaitləri barədə Elmi Şura üzvlərini məlumatlandırdılar.

Gündəlikdəki məsələlər haqqında müvafiq qərarlar qəbul edildikdən sonra Elmi Şura üzvləri cari məsələlərin müzakirəsinə keçdilər. Rektor Hassan Niknafs çıxış edərək, daxili nizam-intizam qaydalarına əməl edilməsi, departamentlər tərəfindən yeni işçilərin cəlb olunması, sillabusların və CV-lərin vaxtında saytda yerləşdirilməsi ilə bağlı nöqsanların olduğunu bildirdi və onların aradan qaldırılması zərurətini vurğuladı. O, həmçinin, 2016-2017-ci dərs ili ilə müqayisədə 2017-2018-ci dərs ilində universitet əməkdaşlarının tədqiqat sahəsində xeyli artıq uğurlar qazandlarını, dərc olunan elmi məqalələrin sayının 3 dəfəyə yaxın artdığını nəzərə çatdırdı və bu sahədə uğurların daha da artacağına ümidvar olduğunu bildirdi.