Ağdaş rayonunun Ləki qəsəbəsindən iki qardaş – Tamerlan Abdullayevlə Tuqay Abdullazadə eyni qrup üzrə eyni bal toplayaraq, Xəzər Universitetinin eyni fakültəsinə – Mühəndislik və tətbiqi elmlər fakültəsinə daxil olmuşlar.
Tamerlan Ləki qəsəbəsindəki 6 saylı tam orta məktəbin məzunudur. 5 il müddətində Ağdaş rayonu M.Şeyxzadə adına Texniki, təbiət və humanitar fənlər təmayüllü gimnaziyada təhsil alıb. IX sinifdə oxuyarkən riyaziyyat olimpiadasında bürünc medal qazanıb. XI sinfi bitirəndə isə qızıl medala layiq görülüb. Tamerlan qəbul imtahanını I qrup üzrə verərək, 690 bal toplamış, kompüter mühəndisliyi ixtisasına qəbul olunmuşdur.
Tuqay Abdullazadə isə orta təhsilə Ağdaş rayonu M.Şeyxzadə adına Texniki, təbiət və humanitar fənlər təmayüllü gimnaziyada başlayıb. Sonra Ağdaş Özəl Türk Liseyinə (hazırda fəaliyyət göstərmir) imtahan verərək, birbaşa V sinifdən VII sinfə keçib. Bir il sonra təhsilini Ləki qəsəbə 6 saylı tam orta məktəbində davam etdirib. Orada oxuduğu 4 il müddətində davamlı olaraq fənn olimpiadalarında iştirak edib. Hər dəfə finala çıxıb. İki dəfə medalçı olub. Məktəbi də qızıl medalla bitirib. Qəbul imtahanı zamanı o da qardaşı kimi 690 bal toplayaraq kompüter elmləri ixtisasına qəbul olunub.
Tamerlan və Tuqay Xəzər Universitetini burada yüksək təhsil verildiyinə əmin olduqlarına görə seçdiklərini bildirdilər.
Qeyd edək ki, qardaşlar müəllim ailəsində dünyaya göz açmışlar. Ataları Səbuhi Abdullayev və anaları Gülnarə Məmmədova ali təhsilli Azərbaycan dili və ədəbiyyatı müəllimidirlər.