AMEA N.Gəncəvi adına Ədəbiyyat İnstitutunun nəşri “Ədəbiyyat məcmuəsi”nin son sayında (2018-ci il, XXXII cild) Xəzər Universiteti Təhsil fakültəsi Azərbaycan dili və ədəbiyyatı departamentinin müəllimi Qardaşxan Əzizxanlının “Müasir Azərbaycan poeziyasında bütöv Azərbaycan ideyası” adlı məqaləsi (179-188-ci səhifələr) çap olunmuşdur. Məqalədə 1813-cü və 1828-ci illərdə Azərbaycanın Cənuba və Şimala bölünməsi ilə əlaqədar yaşanan ümumxalq faciəsinin müasir poeziyamızda ifadəsindən –M.Araz, S.Tahir, M.İsmayıl kimi şairlərin bu mövzunu yaradıcılıqları boyu daim gündəmdə saxlamasından danışılır. Qeyd olunur ki, Cənub mövzusu Azərbaycanın vətəndaş lirikasında əsas motivlərdən biri olmaqla, poeziyamızın avanqardı olan həmin şairlərimizin yaradıcılığında başlıca yer tutur.