2018-ci il sentyabrın 29-da Xəzər Universiteti İnkişaf Mərkəzinin təşkilatçılığı ilə universitetin Buzovnada yerləşən yenicə əsası qoyulmuş Konfrans və İstirahət Mərkəzində Xəzər Universitetinin bütün fakültələrinin, departamentlərinin, mərkəzlərinin, habelə, “Dünya” məktəbi nümayəndələrinin iştirak etdiyi “Korporativ inkişaf” seminarı baş tutdu. Bəzi departamentlərin tələbələri də birgə ərsəyə gəlmiş ideyalarını təqdim etmək üçün tədbirdə könüllü olaraq iştirak edirdilər. Seminar universitetin inkişafı, xüsusilə yay və qış məktəblərinin təşkili ilə bağlı müzakirələr aparmaq və yeni yaradıcı ideyalar ortaya qoymaq məqsədi daşıyırdı.
İnkişaf seminarı Xəzər Universitetinin təsisçisi, Direktorlar və Qəyyumlar şurasının sədri professor Hamlet İsaxanlının vacib cari məsələlərə həsr olunmuş təqdimatı ilə başladı. O, öz təqdimatında universitetin üzləşdiyi problemlər və onu gözləyən perspektivlər haqqında danışdı və bu problemlərin həllini növbəti akademik il üçün strateji istiqamət olaraq təyin etdi. Çıxışdan sonra ideyalar ortaya qoymaq məqsədilə komandalar və departamentlər tərəfindən təqdim edilən 3 ardıcıl sessiya ilə vorkşop davam etdi.
Daha sonra Xəzər Universitetində açılması planlaşdırılan yay və qış məktəbləri haqqında canlı müzakirələr aparıldı. Bütün departamentlər mövzu ilə bağlı öz ideya və təkliflərini təqdim etdilər.
Yeni layihə və yeni maliyyələşmə imkanlarına həsr edilmiş ikinci sessiyanı Xəzər Universitetinin Elmi işlər üzrə prorektoru Dr. İradə Xəlilova apardı. O, iştirakçıları yeni qrant, təqaüd və araşdırma imkanları haqqında ətraflı məlumatlandırdı.
Tam günü əhatə edən seminar tələbələr və kollektivin əylənə, dincələ və müzakirə olunan mövzuları əks etdirə biləcəyi şəkildə təşkil edilmişdi. Buzovnada yerləşən Xəzər Konfrans və İstirahət Mərkəzi təbiətdən həzz alaraq, yaradıcı şəkildə işləmək üçün enerji ala biləcəyiniz ideal məkandır.