2018-ci il sentyabrın 20-də Xəzər Universitetinin “Neftçilər” kampusunda 2018/2019-cu tədris ilində universitetə qəbul olunmuş əcnəbi magistr və doktorantlarla görüş keçirildi.
Xəzər Universitetinin rektoru Dr. Hassan Niknafs iştirakçıları salamladı və açılış nitqi söylədi. Görüşün məqsədi yeni tələbələri universitetin akademik mühiti, qaydaları və təhsil siyasəti ilə tanış etmək və onların suallarını cavablandırmaq idi.
Elmi İşlər üzrə prorektor Dr. İradə Xəlilova Xəzər Universitetində aparılan tədiqatlar barədə tələbələrə məlumat verdi. Magistratura, doktorantura və elmi işlər bölməsinin müdiri Dr. Eldar Şahgəldiyev Azərbaycanda magistratura və doktorantura pilləsində aparılan tədqiqatların təşkili barədə danışdı. Beynəlxalq Əlaqələr Şöbəsinin direktoru Turan Cəfərova Təhsil Nazirliyi və Dövlət Miqrasiya Xidmətinin qaydaları barədə məlumat verdi.
Qeyd edək ki, cari akademik ildə Xəzər Universitetinə Əfqanıstan, Hindistan, İndoneziya, İran, İraq, İordaniya, Lesoto, Malavi, Pakistan, Tacikistan və s. ölkələrdən magistr və doktorantura pilləsinə tələbə qəbul olunmuşdur.