2018-ci il sentyabrın 25-də moderator.az xəbər portalı Ankarada Xəzər Universitetinin mərhum professoru Camal Mustafayevin xatirəsinin yad edildiyi tədbirdən – konfransdan geniş xəbər yaymışdır. Xəbərdə deyilir ki, Beynəlxalq Türk Mədəniyyəti Təşkilatı (Uluslararası Türk Kültür teşkilatı – TÜRKSOY) və Borçalı Cəmiyyətinin birgə təşkilatçılığı ilə “Türk Dünyasının öncülləri” sırasından görkəmli filosof Camal Mustafayevin xatirəsinə və Borçalı Elinin tanıdılmasına həsr olunmuş möhtəşəm tədbir keçirilib.

Tədbirin aparıcısı Cavid Mövsünlünün qısa giriş çıxışından sonra söz TÜRKSOY-un baş katibi Düsen Kaseinova verilib. Baş katib Borçalı Cəmiyyətinin nümayəndə heyətini və tədbirə qatılanları salamlayaraq qurumda Türk Dünyasının görkəmli şəxsiyyətləri haqda düzənlənən tədbirlərə diqqət çəkib və Camal Mustafayevin xatirəsinə belə bir tədbir keçirdikləri üçün məmnunluğunu ifadə edib. Sonra Alan millət vəkili, TBMM-nin Türkiyə-Azərbaycan Dostluq Qrupunun sədri Şamil Ayrım bu kimi tədbirlərin keçirilməsinin Türk Dünyası adına önəminə işarə edərək, bundan ötrü parlamentdə hər zaman təklifləri eşitməyə hazır olduğunu dilə gətirib. Türkiyə prezidentinin baş müşaviri Yalçın Topçu konfrans iştirakçılarını Türkiyə Cumhuriyyətinin prezidenti Rəcəb Tayyib Ərdoğanın adından salamlayaraq, Camal Mustafayev şəxsiyyəti, Borçalı Eli, onun mədəniyyəti haqda konfrans iştirakçıları qarşısında nitq söyləyib.

Konfransın ilk məruzəsi ilə isə Borçalı Cəmiyyətinin sədri Zəlimxan Məmmədli çıxış etdi. Öz məruzəsini Borçalı Eli haqda ətraflı məlumatla başlayan Cəmiyyət sədri bu şəkildə mötəbər konfransın təşkilinə görə TÜRKSOY təşkilatına təşəkkürünü bildirdi. Borçalı Elinin tanınmış saz və söz ustalarına işarə edən Z. Məmmədli belə bir mühitdə həm də filosof Camal Mustafayev kimi şəxsiyyətin formalaşmasına xüsusi diqqət çəkdi. Camal Mustafayevin yaradıcılığı, elmi araşdırmaları və ən önəmlisi fəlsəfi dünyası haqda ətraflı məruzə edən Z.Məmmədli Borçalı Cəmiyyətinin Camal Mustafayevin xatirəsinə “Qələm və kəlam” mükafatı təsis etdiyini bildirərək, əlavə etdi ki, Camal Mustafayev elmdə zirvəyə ucaldığı qədər, insanlıqda da o zirfəni fəth etmişdi.

Daha sonra Gürcüstan Aşıqlar Birliyinin sədri, tanınmış şair Osman Əhmədoğlu, Ankara Yıldırım Beyazit Universitesinin müəllimi, doktor Oğuzhan Aydın çıxış edərək, aşıqlıq sənəti və onun bölmələri haqda məlumat veriblər. Konfransın 3-cü bölümündə Aşıq Selahettin Dündar, Aşıq Nargilə Mehdiyeva, Aşıq Tərmeyxan Qurbanov, Marneulidə fəaliyyət göstərən SARVAN rəqs qrupunun alqışlarla müşayiət olunan çıxışları olub. Sonda konfrans iştirakçılarına TÜRKSOY və Borçalı Cəmiyyəti tərəfindən xüsusi hədiyyələr təqdim edilib.

Xəbəri bu linkdə oxumaq olar:

http://www.moderator.az/news/241415.html.