2018-ci il sentaybrın 24-də Üzeyir Hacıbəyli Beynəlxalq Musiqi Festivalı çərçivəsində Xəzər Universitetinin Fikrət Əmirov adına konfrans-konsert salonunda SSRİ Xalq artisti, Dağıstan musiqisinin banilərindən biri, ictimai xadim, görkəmli bəstəkar Murad Kajlayev ilə yaradıcılıq görüşü keçirildi.

Tədbirdə Xəzər Universitetinin və Azərbaycan Bəstəkarlar İttifaqının rəhbərliyi, bəstəkarın sənət dostları, ölkənin musiqi ictimaiyyətinin nümayəndələri, universitetin əməkdaşları və tələbələri iştirak edirdilər.

Görüş Murad Kajlayevin həyat və yaradıcılığından bəhs edən filmin nümayişi ilə başlandı. Sonra Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı tədbiri açaraq, iştirakçıları və görkəmli bəstəkarı salamladı, onun yaradıcılığı haqqında geniş məlumat verdi.

Azərbaycan Bəstəkarlar İttifaqının katibi, Əməkdar incəsənət xadimi bəstəkar Sərdar Fərəcov, teatr rejissoru, əməkdar incəsənət xadimi Əli Usubov, Xalq artisti bəstəkar Tofiq Bakıxanov, Əməkdar incəsənət xadimi Telman Hacıyev, Əməkdar incəsənət xadimi Rafiq Seyidzadə çıxış edərək, Azərbaycan musiqi mədəniyyətinin yetirməsi olan Murad Kajlayevin çoxşaxəli yaradıçılığından və vətəninin musiqisi, tarixi, zəngin folkloru ilə ayrılmaz surətdə bağlı olan əsərlərinin dünyanın bir çox ölkələrində ifa olunmasından danışdılar, bəstəkarın Bakı həyatından xatirələr söylədilər.

Bəstəkarın əsərlərindən ibarət geniş konsert proqramında onun müxtəlif janrda əsərləri ifa olundu. Xalq artisti Fəxrəddin Kərimovun dirijorluğu ilə keçən konsertdə “Xəzər” Universitetinin kamera orkestri (bədii rəhbər Zülfiyyə Sadıqova), solistlər – Əməkdar artist Səbinə Vahabzadə (vokalçı), Culiya Behbudova (vokalçı), İsrafil Rəsulov (truba ifaçısı), Səidə Tağızadə (pianoçu), Zülfiyyə Sadıqova və Azər Dəmirov (violin ifaçısı, ABŞ) maraqlı musiqi nömrələrini tədbir iştirakçılarına təqdim etdilər.

Konsertdən sonra Murad Kajlayev çıxış edərək, yaradıcılıq görüşünün təşkilinə görə Xəzər Universitetinin rəhbərliyinə, konsertin iştirakçılarına və tamaşaçılara təşəkkürünü bildirdi.

Sonda professor Hamlet İsaxanlı görgəmli bəstəkara, həmçinin dirijor Fəxrəddin Kərimova və konsertin digər iştirakçılarına hədiyyələr verdi. Murad Kajlayev Xəzər Universitetinə öz kitablarını hədiyyə etdi.

Tədbirdən Azərbaycan Dövlət İnformasiya Agentliyi – AZƏRTAC başda olmaqla https://azertag.az/xeber/Gorkemli_bestekar_Murad_Kajlayevin_muellif_gecesi_kechirilib-1197756) ölkənin aparıcı saytları və mətbuat orqanları xəbər yaymışlar.