2018-ci il sentyabrın 19-21-də Bakıda Erciyes Universiteti, Xəzər Universiteti, Azərbaycan Milli Tarix Muzeyi və Türk Tarix Qurumunun təşkilatçılığı ilə I Beynəlxalq Türk Məzar Daşları Simpoziumu keçirildi. Simpoziumun rəsmi açılışı sentyabrın 19-da Azərbaycan Milli Tarix Muzeyində oldu.
Açılış mərasimində Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, Milli Tarix Muzeyinin direktoru akademik Nailə Vəlixanlı, Erciyes Universitetinin professoru Celil Arslan və digərləri çıxış etdilər.
Günün ikinci yarısı və sentyabrın 20-də simpozium öz işini Xəzər Universitetində davam etdirdi. Türkiyəli və azərbaycanlı mütəxəssislərin simpozium mövzusunu əhatə edən 30-a qədər məruzəsi dinlənidi, sorğular cavablandırıldı, müzakirələr aparıldı.
Günün sonunda simpoziumun bağlanış mərasimi keçirildi. Tədbirdə professorlar Yaşar Çorunlu, Halit Çal, Abbas Seyidov, dosent Celil Arslan və doktorant Tülin Çorunlu çıxış edərək, simpoziumun müştərək türk tarixinin tədqiqi və öyrənilməsi baxımından böyük əhəmiyyətini, dinlənilən məruzələrin yüksək peşəkarlıqla hazırlandığını qeyd etdilər və simpoziumun keçirilməsi üçün yaradılmış şəraitə görə Xəzər Universitetinin rəhbərliyinə və təşkilatçılara minnətdarlıq bildirdilər. Məruzəçilərə sertifikat təqdim olundu.
Simpoziumun Təşkilat komitəsinin üzvü, Xəzər Universitetinin İctimai əlaqələr və media üzrə direktoru Əlövsət Əmirbəyli simpoziuma qatıldıqlarına görə iştirakçllara Xəzər Universiteti adından təşəkkürünü bildirdi. Celil Arslan simpoziumun təşkilindəki fəal işinə görə Əlövsət Əmirbəyliyə təşəkkür plaketi və hədiyyə təqdim etdi.
Sonda professor Abbas Seyidov özü ilə gətirdiyi sazında aşıq havaları və “Çırpınırdı Qara dəniz” mahnısını çaldı. Böyük şair Əhməd Cavad və dahi bəstəkar Üzeyir Hacıbəylinin yadigarı, Azərbaycan türkləri qədər Türkiyə türkləri üçün də doğma oan “Çırpınırdı Qara dəniz” mahnısının iştirakçılar tərəfindən ifası ilə simpozium işini başa çatdırdı.
Sentyabrın 21-də simpozium iştirakçıları Şəhidlər xiyabanında şəhidlərin xatirəsini yad etdilər, Qobustan Dövlət Tarixi-Bədii Qoruğu və "Atəşgah məbədi" Dövlət Tarix-Memarlıq Qoruğunda oldular, İçərişəhəri gəzib, Şirvanşahlar sarayı ilə tanış oldular.
Simpozium haqqında respublika mediasında yayınlanmış materialların bir qismini bu linklər vasitəsilə izləmək olar:
http://az.strategiya.az/index.php?do=xeber&id=135236;