2018-ci ilin sentyabrın 18-də Bakı Yunus Emre İnstitutu və Xəzər Universitetinin birgə əməkdaşlığı ilə Xəzər Universitetinin “Mərmər” zalında Bakının Qafqaz İslam Ordusu tərəfindən erməni-daşnak qüvvələrindən azad olunmasının 100-cü ildönümünə həsr olunan “Yüz illik əmanət: Qafqaz İslam Ordusu” adlı panel keçirildi. Paneldə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, Xaricdə Yaşayan Türklər və Qohum Birliyi Başqanlığının vitse-prezidenti cənab Sayit Yusuf, Şimali Kipr Bakı nümayəndəsi Ufuk Arca Turganer, Türkiyə səfirliyinin mətbuat müşaviri Hamid Karadeniz, TRT Bakı təmsilçiliyinin müdiri Murat Akkoç, Xəzər Universitetinin əməkdaşları, Tarix və arxeologiya departamentinin müdiri Roza Arazova, müəllimləri Orxan Zamanov, Ülviyyə İbrahimli, Samirə Qarayeva, tarix ixtisasının tələbələri və digər qonaqlar iştirak edirdilər. Paneldə professor Hamlet İsaxanlı, Yunus Emre İnstitutunun rəhbəri Doç. Dr Cihan Özdemir və Xəzər Universitetinin Tarix və arxeologiya departamentinin müəllimi Dr. Telman Nüsrətoğlu Qafqaz İslam Ordusunun quruluşu və Gəncədən Bakının işğaldan azad edilməsinə qədər davam edən çətin mübarizəsi, dövrün mürəkkəb geopolitik mənzərəsi, Azərbaycan-Türkiyə qardaşlığının tarixi kökləri haqda məruzələrlə çıxış etdilər.

Panel Türkiyə və Azərbaycan mediası tərəfindən geniş şəkildə işıqlandırılmışdır.