2018-ci il sentyabr 17-də “Dünya” məktəbində Azərbaycan Respublikasının Prezidenti yanında Bilik Fondunun sədri pedaqogika üzrə fəlsəfə doktoru, dosent Oktay Səmədovla görüş keçirildi.

Məktəb rəhbərliyi, müəllimlər və yuxarı sinif şagirdlərinin iştirak etdiyi görüşdə natiq “Azərbaycan Xalq Cümhuruyyəti –Dövlətçiliyimizin bayraqdarı” mövzusunda çıxış etdi. O, Azərbaycanda insan kapitalının formalaşmasının zəruriliyindən söhbət açaraq, dünyada gərginlik yaşandığı bir dövrdə –21-ci əsrdə bilikli, savadlı, öz milli-mənəvi dəyərlərinə, dövlətinə, vətəninə sadiq vətəndaşların çoxalmasının mühüm olduğunu vurğuladı. “İnsan kapitalı zəngin, məhsuldar, cəmiyyətə vacib məfhumdur,” –deyən O.Səmədov təhsilə, savada yiyələnmənin, “ömür boyu təhsil”in vacibliyini qeyd etdi.

Azərbaycan Xalq Cümhuriyyəti dövründən söz açan Oktay Səmədov, həmçinin bu dövrün indiki Azərbaycana verdiyi böyük töhfələrdən danışdı. O, qədim dövlətçilik ənənələrinə söykənən ölkəmizin bugünkü inkişafından söz açdı, dünyada baş verən proseslərin, gərgin hadisələrin fonunda ölkə başçısına dəstək olmağın, ölkəmizin daha da möhkəmlənməsi istiqamətində bilik, mükəmməl təhsil və savadla çalışmağın qarşıda duran vəzifə olduğunu söylədi.

Sədrlik etdiyi Bilik Fondunun fəaliyyətinin işinin birbaşa maarifləndirmə olduğunu deyən natiq müasir texnologiyalardan istifadə etməklə bərabər, ilk növbədə kitab oxumağın, mütaliəyə marağın artırılmasını, alimlərlə, təhsil işçiləri ilə əlaqələrin möhkəmləndirilməsinin ən mühüm vəzifələrdən biri olduğunu bildirdi.

Oktay Səmədov informasiya burulğanının içərisində gərgin həyat yaşadığımız müasir dövrdə belə görüşlərin tez-tez keçirilməsinin zəruri olduğunu dedi.

Sözünün sonunda Oqtay Səmədov “Dünya” məktəbində təhsil üçün yaradılan şəraitdən razılığını bildirdi.