2018-ci il sentyabrın 12-də “Azərbaycan Universitetlərində Tədris və Təlimin Təkmilləşdirilməsi” (PETRA) adlı ERASMUS+ layihəsi çərçivəsində Xəzər Universitetində Təlim-Tədris Mərkəzi açıldı. Təlim-Tədris Mərkəzi direktor və direktor müavini olmaqla, iki nəfərlik heyətdən ibarətdir. Mərkəzin yaradılmasında məqsəd Xəzər Universitetində təlim-tədris prosesinin keyfiyyətini yüksəltmək, innovativ və yeni təlim metodlarını tələbələrin ehtiyaclarına uyğun tətbiq etmək, təlim və tədris prosesinin tədqiqat əsaslı olmasını təmin etmək və Xəzər Universitetinin kadr və elmi potensialını artırmaqdan ibarətdir.

Təlim-Tədris Mərkəzi aşağıdakı vəzifələri həyata keçirəcək:

1. Universitetin təlim-tədris strategiyasının hazırlanmasını və həyata keçməsini təmin etmək;

2. Tələbə və müəllim heyətinin ehtiyaclarına uyğun olaraq seminar və kursların təşkilini təmin etmək;

3. Doktorant tələbələrin və gənc tədqiqatçıların tədqiqatlarının uğurlu aparılmasını təmin edəcək seminar və kursların təşkilini həyata keçirmək;

4. Müəllimlərin universitet həyatına sürətli adaptasiya olması üçün seminarlar təşkil etmək;

5. Müəllimlərin keyfiyyətli tədris aparmaları üçün zəruri təlimləri təyin və təşkil etmək;

6. Tələbələrin ehtiyaclarını öyrənərək uyğun seminarları təşkil etmək;

7. Doktorant tələbələrin və gənc tədqiqatçıların seminarlarını təşkil etmək;

8. Bakalavr və magistr tələbələrin akademik yazı, statistik analiz və təqdimat bacarıqlarının artırılması üçün seminarları təşkil etmək.