2018-ci il sentyabrın 14-də Xəzər Universitetinin Tarix və arxeologiya departamentinin müdiri Roza Arazova, departamentin müəllimləri Səbuhi Əhmədov və Orxan Zamanov AMEA Milli Azərbaycan Tarixi Muzeyində “Millət sizə minnətdardır!” adlı sərginin açılış mərasimində iştirak etdilər.

Qafqaz İslam Ordusu və Bakının azad edilməsinin 100 illiyinə həsr olunmuş sərgi Milli Azərbaycan Tarixi Muzeyi və Türkiyə Cümhuriyyətinin Azərbaycan Respublikasındakı Səfirliyinin birgə səyləri ilə təşkil olunmuşdu. Açılış mərasimi Muzeyin Şərq zalında keçirildi – əlamətdar haldır ki, 100 il əvvəl bu zalda H.Z.Tağıyev, başda Nuru Paşa olmaqla, Qafqaz İslam Ordusunun komandanlığı şərəfinə ziyafət vermişdi.

Sərginin açılış mərasimində Milli Azərbaycan Tarixi Muzeyinin direktoru akademik Nailə Vəlixanlı, AMEA-nın İctimai elmlər bölməsinin akademik-katibi akademik Nərgiz Axundova, Türkiyə Cümhuriyyətinin Azərbaycan Respublikasındakı fövqəladə və səlahiyyətli səfiri Erkan Özoral, Azərbaycan Respublikası Prezidenti Katibliyinin rəisi, Prezidentin köməkçisi professor Dilarə Seyidzadə çıxış etdilər. Sərginin kuratoru Səbuhi Əhmədov sərginin mahiyyəti, strukturu və eksponatları haqqında məlumat verdi.

Çıxışlardan sonra sərgiyə baxış keçirildi.

Qeyd edək ki, sərgi 2018-ci il dekabrın 14-nə kimi davam edəcək.

Sərgidə 1918-ci ildə Azərbaycanda baş vermiş hərbi-siyasi hadisələr, o cümlədən, Bakı Sovetinin anti-Azərbaycan siyasəti, azərbaycanlıların soyqırımı, Qafqaz İslam Ordusunun yaradılması və Bakının azad edilməsi ilə nəticələnmiş iyun-sentyabr yürüşü əyani şəkildə nümayiş etdirilir. Sərgidə Muzeyin Silahlar və bayraqlar fondu, Xatirə əşyaları və hədiyyələr fondu, Köməkçi tarixi fənn materialları fondundan 120-dən artıq unikal tarixi eksponat ziyarətçilərə təqdim edilir.