2018-ci il sentyabrın 15-də Xəzər Universitetində yeni dərs ilinin başlanmasına həsr olunmuş mərasim keçirildi. Tədbirdə universitetin rəhbərliyi və əməkdaşları, universitetə yeni qəbul olunmuş tələbələr və onların valideynləri, qonaqlar iştirak edirdilər.

Mərasim Azərbaycanın Dövlət Himninin ifası ilə başladı. Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, universitetə qəbul olunmuş gəncləri təbrik etdi, universitetin təhsil mühiti və beynəlxalq əlaqələrindən, tələbələrin hərtərəfli inkişafı üçün görülən işlərdən danışdı. Universitetin rektoru Dr. Hassan Niknafs da tələbələri təbrik etdi, onlara təhsillərində uğurlar arzuladı.

H.İsaxanlı, H.Niknafs, İqtisadiyyat və menecment fakültəsinin dekanı Ceyhun Məmmədov, Humanitar və sosial elmlər fakültəsinin dekanı Cabir Xəlilov və Təhsil fakültəsinin dekanı Elza Səmədova universitetə yüksək balla qəbul olunmuş bir qrup tələbəyə tələbə bileti və hədiyyələr təqdim etdilər, onlarla xatirə şəkli çəkildi.

Universitetə yeni qəbul olunmuş tələbələr adından orta məktəbi qızıl medalla bitirmiş, 690 bal toplamış Tamerlan Abdullayev (Mühəndislik və Tətbiqi Elmlər fakültəsi, kompüter mühəndisliyi ixtisası) çıxış edərək, qardaşı Tuqayla birlikdə (690 bal, Mühəndislik və Tətbiqi Elmlər fakültəsi, kompüter elmləri ixtisası) Xəzər Universitetini ən yüksək səviyyəli təhsil verən ali məktəb kimi tanıdıqlarına görə seçdiklərini söylədi, tələbələrə uğurlar arzuladı.

Universitetin Musiqi və İncəsənət departamentinin hazırladığı, M.F.Axundov adına Dövlət Akademik Opera və Balet Teatrının solisti, Xəzər Universitetinin müəllimi Məhsəti Cabbarlı və müğənni tələbələrin iştirakı ilə keçən konsertdən sonra universitetin İdarəetmə və tələbə işləri üzrə prorektor İsaxan İsaxanlı tələbələri auditoriyalara dəvət etdi. Fakültə dekanları, departament müdirləri və əməkdaşlar tələbələrə universitet və ixtisaslar haqqında geniş məlumat verdilər, onların suallarını cavablandırdılar.

Xəzər Universitetində daha bir yeni dərs ili başladı.