2018-ci il avqustun 13-18-də Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı onu müşayiət edən kinorejissor Vladimir Mun'la birlikdə Kanadaya səfər etdi. 

Səfərin məqsədi Hamlet İsaxanlının 1985-87-ci illər Kanada səfərlərinin izi ilə getmək, uyğun universitet, şəxslər və yerləri bir daha görmək, həmçinin bəzi çəkilişlər etmək və yeni münasibətlər yaratmaq idi.  

Hamlet İsaxanlı əvvəllər mühazirələr oxuduğu, elmi konfrans və seminarlarda çıxış etdiyi üç Kanada universiteti - Toronto, Calgary və Dalhousie universitetlərindən ikisində - Toronto və Calgary universitetlərində oldu. O,  Calgary universitetində oxuduğu mühazirələrdə iştirak edən, hazırda təqaüddə olan iki görkəmli riyaziyyatçı - 102 yaşlı professor Richard Gay və 90 yaşlı professor Peter Lancaster ilə görüşdü - birinci ilə üzbəüz, ikinci ilə qiyabi olaraq. 

Hamlet İsaxanlı Calgary Universiteti Riyaziyyat və statistika departmentinin müdiri professor Tony Ware ilə görüşüb, iki universitet arasında, xüsusilə riyaziyyat və onun tətbiqləri üzrə yaxın əlaqələrin  yaradılması barədə razılıq əldə etdi.

Hamlet İsaxanlı yenə 1985-87-ci illərdə baş tutmuş səfərlərinin izi ilə məşhur Lake Louise gölünü, Kanadanın məşhur milli parkı Banff'ı və bəzi zirvələrinə çıxdığı Rocky Mountain dağlarını da ziyarət etdi.