2018-ci il iyulun 2-də Türkiyə Cümhuriyyətinin Azərbaycandakı səfirliyində səfirliyin təşkilatçılığı ilə Türkiyə-Azərbaycan dostluq konserti oldu. Konserti giriş sözü ilə Türkiyə Cümhuriyyətinin Azərbaycandakı fövqəladə və səlahiyyətli səfiri Erkan Özoral açdı. Azərbaycan Milli Konservatoriyasının prorektoru musiqişünas Lalə Hüseynovanın çıxışından sonra konsert başlandı.

Konsertdə Xəzər Universitetinin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın rəhbərlik etdiyi universitetin Kamera orkestrinin müşayiəti ilə əməkdar incəsənət xadimləri Vasif və Ceyhun Allahverdiyev qardaşlarının mahnı və romansları ifa olundu. Solistlər - əməkdar artist Lalə Məmmədoba, Kəmalə Nəbiyeva, Ayan Qurbanova, Aqşin Abdullayev, Aynur İsgəndərli, Mirələm Mirələmov və Kəmalə Nəbiyeva idi. Zurnada Araz Fətəliyev, zərb alətində Murad Nağızadə ifa edirdilər.

Sonda Azərbaycan Respublikası Milli Məclisinin Əmək və sosial siyasət komitəsinin sədri Hadı Rəcəbli çıxış edərək, Azərbaycan-Türkiyə qardaşlığından danışdı, Xəzər Universiteti, Kamera orkestri və solistlər haqqında xoş sözlər söylədi.

Konsert AzTV, Space TV və TRT kanallarında geniş işıqlandırıldı.