2018-ci il iyunun 29-u və 30-da Xəzər Universitetinin “Neftçilər” kampusunda “Mərmər” zalda Azərbaycanda müəllim hazırlığı aparan pedaqoji fakültələrdə və ümumtəhsil məktəblərində təlim-tədris prosesinin inkişaf etdirilməsinə, dünya təhsil sisteminə inteqrasiyasına töhfə vermək məqsədilə “Təlim nəticələrinə əsaslanan inteqrativ dərs materiallarının hazırlanması” (seminar və vörkşop) adlı təlim keçirildi. Təlimçilər Türkiyə Cümhuriyyətinin Çankaya Universitetinin dekanı Prof.Dr. Buket Akkoyunlu və Xəzər Universitetinin Təhsil Fakültəsinin dekanı dosent Elza Səmədova idilər.

Əsas məqsədi pedaqoji fakültələrdə və ümumtəhsil məktəblərində fəaliyyət göstərən müəllimlərin müasir dərs materialı hazırlama peşəkarlığının artırılması olan təlimdə Təhsil İnstitutundan və respublikanın müxtəlif ali təhsil müəssisələrindən və ümumtəhsil məktəblərindən 30-a yaxın müəllim iştirak edirdi.

Təlimdə standart əsaslı kurikulumların tətbiqində mühim yeri tutan layihə əsaslı öyrənmə/öyrətmə metodologiyası üzərində dayanılaraq, nümunələr göstərildi və iştirakçılar tərəfindən məzmun standartlarına əsaslanan inteqrativ layihə nümunələri hazırlandı.

Təlimin sonunda iştirakçılara sertifikatlar təqdim olundu.