İyunun 28-də Xəzər Universitetinin Mərmər salonunda Humanitar və sosial elmlər fakültəsinin dizayn ixtisası üzrə təhsil alan tələbələrinin əl işlərinə baxış keçirildi. Tədris ilinin yekunlarına aid sərgidə tələbələrin öz müəllimləri – dizayner-rəssamlar Anar Əsədov və Kamran Əsədovun rəhbərliyi ilə hazırladıqları müxtəlif nümunələr (maketlər, qrafik təqvim, jurnal və kataloqlar, videolar) nümayiş olundu. Tədbirdə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı başda olmaqla universitet rəhbərliyi, dekanlar və departament müdirləri, əməkdaşlar iştirak edirdilər.

Universitetin Musiqi və incəsənət departamentinin müdiri Zülfiyyə Sadıqova tədbiri açaraq, sözü Dizayn departamentinin müdiri Afaq Kərimovaya verdi. A.Kərimova tələbələrin sərgi-baxışa ciddi hazırlaşdıqlarından, əl işlətinin əsas etibarilə uğurlu alındığından danışdı.

Tələbələr öz stendləri yanında universitet rəhbərliyinə və əməkdaşlara öz işləri haqqında məlumat verir, suallarını cavablandırırdılar. Professor Hamlet İsaxanlı tələbələrin əl işlərinə baxaraq, onlara tövsiyələrini verdi.

Humanitar və sosial elmlər fakültəsinin dekanı Cabir Xəlilov, müəllim Anar Əsədov və digərləri çıxış edərək, tələbələrin əl işlərini yüksək qiymətləndirdilər və onlara uğurlar arzuladılar.