2018-ci il iyulun 2-də Avrasiya Hasilat Sənayesi Bilik Mərkəzinin  Xəzər Universitetində “Təbii sərvətlərlə zəngin ölkələrdə gəlirlərin idarə olunması” mövzusunda keçirdiyi təlimə yekun vuruldu. 8 gün davam edən təlimdə iştirakçılar yerli və beynəlxalq ekspertlərin mövzuya dair təqdimatlarını dinlədilər, eləcə də, Dövlət Neft Fonduna səfər etdilər.

Təlimin bağlanış mərasimində İsveçrə Əməkdaşlıq Təşkilatının Regional Direktor Müavini və İsveçrə Səfirliyi missiya rəhbərinin müavini xanım Simone Haeberli, Xəzər Universitetinin rektoru Dr. Hassan Niknafs, Avrasiya Hasilat Sənayesi Bilik Mərkəzinin direktoru İnqilab Əhmədov və NRGİ Avrasiya direktoru Qalib Əfəndiyev çıxış etdilər. Çıxışçılar təlim müddətində əldə olunan bilik və təcrübənin ölkələrinin inkişafı naminə istifadə olunacağına inandıqlarını vurğuladılar.

Qeyd edək ki, təlimdə Avrasiya regionunun 6 ölkəsindən –Qazaxıstan, Qırğızıstan, Tacikistan, Monqolustan, Ukrayna və Azərbaycandan 23 nəfər iştirak edirdi. İştirakçılar arasında hökumətin, vətəndaş cəmiyyətinin, media və özəl sektorun nümayəndələri var idi.

Sonda iştirakçılara sertifikatlar təqdim edildi.