2018-ci il iyunun 22-də Fövqəladə Hallar Nazirliyi (FHN) işçilərinin həmkarlar ittifaqı ümummilli lider Heydər Əliyevin anadan olmasının 95 və Azərbaycan Silahlı Qüvvələrinin yaradılmasının 100 illiyi münasibətilə 29 Gəncə Regional Mərkəzində “Ümummilli lider Heydər Əliyev və Silahlı Qüvvələr” mövzusunda elmi-praktiki konfrans keçirib.

Konfransda Fövqəladə Hallar Nazirliyi işçilərinin həmkarlar ittifaqının rəhbərliyi, Gəncə şəhər idarə və müəssisələrinin rəsmiləri, FHN Gəncə Regional Mərkəzinin əməkdaşları və ictimaiyyət nümayəndələri iştirak ediblər.

Tədbirdə FHN işçilərinin Həmkarlar İttifaqının sədri Mehman İsmayılov, Gəncə Dövlət Universitetinin professoru, tarix elmlər doktoru Həsənbala Sadıqov və digərləri çıxış edərək, Azərbaycan Xalq Cümhuriyyəti dövründə ordu quruculuğuna geniş nəzər salıblar.

Tədbir konsert proqramı ilə davam edib. Xəzər Universitetinin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın rəhbərlik etdiyi universitetin Kamera orkestrinin müşayiəti ilə Xəzər Universitetinin müəllimi, Müslüm Maqomayev adına Dövlət Akademik Filarmoniyasının solisti Məhsəti Cabbarova və Azərbaycan Dövlət Musiqili Teatrının solisti Atəş Qarayevin ifasında Azərbaycan bəstəkarlarının əsərləri səsləndirilib. Konsert proqramına gənc istedadlı musiqiçi Cavad Tağızadə dirijorluq etmişdir.