2018-ci il iyunun 18-dən 23-dək Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, Elmi işlər üzrə prorektor dosent İradə Xəlilova, İnkişaf Mərkəzinin layihə meneceri Ülkər Bayramova, Təhsil fakültəsinin koordinatoru Qoşqar Məhərrəmov və İngilis dili və ədəbiyyatı departamentinin proqram koordinatoru Milana Abbasova “Azərbaycan universitetlərində tədris və təlimin təkmilləşdirilməsi” adlı ERASMUS+ layihəsi çərçivəsində İspaniyanın Valensia Politexnik Universitetində keçirilən silsilə seminarlarda iştirak etdilər.

Tədbirdə həm Azərbaycandan (Xəzər Universiteti, Naxçıvan Dövlət Universiteti, Gəncə Dövlət Universiteti, Sumqayıt Dövlət Universiteti, Bakı Slavyan Universiteti, Azərbaycan Dillər Universiteti, Azərbaycan Universiteti, Azərbaycan Respublikası Təhsil Nazirliyi), həm də Avropadan (Debrecen Universiteti (Macarıstan), Jyväskylä Universiteti (Finlandiya), Vyana Tətbiqi Elmlər Universiteti (Avstriya), Qazi Universiteti (Türkiyə) olan tərəfdaş universitetlərin 30-a yaxın nümayəndəsi iştirak etdirdi.

5 günlük seminarda iştirakçılar Valensia Politexnik Universiteti, universitetdə tədqiqat işləri, tədqiqat işlərinin elektron bazasının yaradılması, istifadəsi və hər kəsə əlçatan olması (Open access), Sakai sistemi haqqında geniş məlumatlar əldə etdilər və test video dərsləri hazırladılar.

İyunun 22-də tədbir iştirakçıları Valensia Politexnik Universitetində keçirilən 4-cü Beynəlxalq Ali Təhsil konfransına qatıldılar. Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı konfransın xüsusi bölməsi kimi təşkil olunmuş PETRA sessiyasının sədri oldu və “Post-kommunist ölkəsi olan Azərbaycanda qloballaşan təhsil” adlı təqdimatla çıxış etdi.