İyunun 11-də Xətai Sənət Mərkəzində Xəzər Universitetinin İqtisadiyyat və menecment fakültəsinin “THE SAME” komandasının planlarından biri olan təsviri sənətdə “Sənin baxışın” sərgi-müsabiqəsinin yekun tədbiri universitetin Dizayn departamentinin təşkilatçılığı və birgə səyi ilə keçirildi. Sərginin əsas məqsədi irqçilik və ayrı-seçkiliyə gənclərin və uşaqların gözü ilə yanaşmaq idi.

Tədbirdə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, universitetin İctimai əlaqələr və media üzrə direktoru Əlövsət Əmirbəyli, İqtisadiyyat və menecment fakültəsinin, eyni zamanda, “THE SAME” komandasının koordinatoru Dr. Bahadır Baysal, Türkiyənin Azərbaycandakı səfirliyinin mədəniyyət və turizm müşaviri İrfan Çiftçi, Amerika səfirliyindən Rumina Mürşüdova, xalq rəssamı, Azərbaycan Rəssamlar İttifaqının katibi Ağaəli İbrahimov, əməkdar incəsənət xadimi, sənətşünas Ziyadxan Əliyev, əməkdar rəssam, Azərbaycan Rəssamlar İttifaqının gənclər bölməsinin sədri Tahir Məmmədov, əməkdar mədəniyyət iscisi, quruluşçu rəssam Rafael Əsədov, əməkdar mədəniyyət işçisi, animator Elçin Axundov, rəssam-dizayner - DTS muzeyinin və Xəzər Universitetinin Dizayn departamentinin müdiri Afaq Kərimova, Xətai Sənət Mərkəzinin direktoru Zahid Əvəzov və digər elm, sənət xadimləri iştirak edirdilər.

Komanda üzvlərinin və qonaqların çıxışlarından sonra musiqi sədaları altında sərgi açıq elan edildi. Sərgidə iki mərhələli seçimdən sonra 41 iştirakçının əl işi nümayiş olunurdu. Görkəmli rəssamlar və qonaqlar əsərləri bir-bir qiymətləndirdilər. Qaliblər həm uşaq kateqoriyasından, həm də gənclər kateqoriyasından seçildi. Birinci yeri Xəzər Universitetinin”Dizayn” ixtisai üzrə təhsil alan tələbəsi Ayan Novruzova, üçüncü yeri isə universitetin gənc müəllimi Leyla Salayeva mövzuya tam cavab verən mənalı əl işləri ilə qazandılar. Qaliblərə və iştirakçılara hədiyyələr, diplomlar təqdim olundu.

Tədbir iştirakçılarına Xəzər Universiteti Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın rəhbərliyi ilə konsert proqramı təqdim olundu. Universitetin Humanitar və sosial elmlər fakültəsinin tələbələri Günel Ələsgərova və Turan Məmmədova müxtəlif mahnılar, Roman Azaflı aşıq havaları ifa etdilər.

AZƏRTAC Dövlət İnformasiya Agentliyi, AzTV-nin Mədəniyyət kanalı, İctimai TV və digər kütləvi informasiya vasitələrindən olan media mənsubları iştirakçılardan və qonaqlardan müsahibə aldılar, tədbiri işıqlandırdılar.