2018-ci il iyunun 4-də Çinin Sosial Elmlər Akademiyası Fəlsəfə İnstitutundan nümayəndə heyəti (ÇSEA) Xəzər Universitetini ziyarət etdilər. Görüşdə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, həmçinin, universitetin rektoru Dr. Hassan Niknafs, prorektorlar professor Məhəmməd Nuriyev, Dr. İsaxan İsaxanlı, dosent İradə Xəlilova, dekanlar – dosent Cabir Xəlilov, dosent Elza Səmədli, dosent Ceyhun Məmmədov və Magistratura, doktorantura və elmi işlər üzrə şöbənin rəhbəri Dr. Eldar Şahgəldiyev iştirak edirdilər.
Dr. Eldar Şahgeldiyevin Xəzər Universiteti haqqında qısa təqdimatından sonra Çinin Sosial Elmlər Akademiyasının (ÇSEA) nümayəndələri ÇSEA Mədəniyyət Siyasəti üzrə Araşdırma Mərkəzinin dosenti Zu Chun Ming, onun həmkarları – ÇSEA Fəlsəfə İnstitutunun professoru Tsui Wei Hang və Mədəniyyətşünaslıq üzrə Milli Mərkəzin direktor müavini professor Li He öz institutları haqqında məlumat verərək, təhsil və tədqiqat, mədəniyyət mübadiləsi, turizm və tələbə mübadiləsi sahələrində gələcəkdə əməkdaşlıq etmək niyyətində olduqlarını ifadə etdilər.
Görüşün sonunda, Professor İsaxanlı Çin dilinə tərcümə edilmiş şeirlər kitabını və Çin haqqında “Böyük çaylar Qərbdən Şərqə doğru axır: Azərbaycan və Çin” sərlövhəli məqaləsini qonaqlara hədiyyə etdi. Öz növbəsində, qonaqlar Konfutsi fəlsəfəsinə həsr edilmiş ÇSEA-nın xüsusi buraxılışı olan kitabı H.İsaxanlıya təqdim etdilər.