2018-ci il iyunun 5-də Xəzər Universitetinin Mərkəz kampusundakı “Dünya” Konfrans-Konsert Salonunda Fikrət Əmirov Konfrans-Konsert Mərkəzinin açılışı oldu. Uzun illər ərzində universitetin mühum ölkə və beynəlxalq tədbirlərinin keçirildiyi, elm və mədəniyyət ictimaiyyətinə yaxşı tanış olan “Dünya” Konfrans-Konsert Salonu, əslində, yeni statusa malik olacaqdı.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı salona toplaşan görkəmli mədəniyyət xadimlərini salamlayaraq, onları barelyefin açılışına dəvət etdi. Açılış mərasimi salondakılar üçün ekranda nümayiş etdirilirdı. Azərbaycan Bəstəkarlar İttifaqının sədri Firəngiz Əlizadə və dahi bəstəkarın qızı Sevil Əliyeva iştirakçıların alqışları ilə barelyefin üzərindən ağ örtüyü götürdülər. “Dünya” Konfrans-Konsert Salonundan açılışa gedən universitet rəhbərliyi və mədəniyyət xadimləri Fikrət Əmirov Konfrans-Konsert Mərkəzinə döndülər.

Professor Hamlet İsaxanlı çıxış edərək, Fikrət Əmirovun həyat və yaradıcılıq yoluna geniş nəzər saldı, böyük musiqiçinin sənət məktəbi yaratdığını və dünyada tanındığını söylədi.

Sonra tədbirin bədii hissəsi başladı. Xəzər Universitetinin Kamera orkestrinin ifasında bəstəkarın “Nizami”simfoniyasının IV hissəsi, “Kürd ovşarı” (Kamera orkestri üçün işləyən “Dünya” Təhsil Komleksinin müəllimi, bəstəkar Sevda Rəhimova), “Sevil” operasından vals, “Min bir gecə” baletindən “Şəhrizadın bayramı” səsləndi.

Xalq artisti Azər Zeynalov “Sevil” operasından “Balaşın ariyası”nı, Azərbaycan Dövlət Musiqili Teatrının solisti, beynəlxalq müsabiqələr laureatı Atəş Qarayev “Balaşın mahnısı”nı, xalq artisti Alim Qasımov və əməkdar artist Fərqanə Qasımova (duet) Hüseyn Cavidin “Şeyx Sənan” tamaşasından “Kor ərəbin mahnısı”nı, əməkdar artist Səbinə Vahabzadə “Azərbaycan elləri”, xalq artisti Gülyanaq Məmmədova “Gecə keçdi” və “Göygöl”, (xalq çalğı alətləri ansamblının müşayiəti ilə), xalq artisti, tarzən Ramiz Quliyev “Mən səni araram” və “Səhər” filmindən “Aslanın mahnısı”nı, əməkdar artist Elşən Mansurov “Laylay” mahnılarını, Xəzər Universitetinin qızlardan ibarət rəqs ansamblı “Min bir gecə” baleti əsasında hazırladığı xoreoqrafik etüdü ifa etdilər.

Tədbirdə Azərbaycan Bəstəkarlar İttifaqının sədri Firəngiz Əlizadə çıxış edərək, Fikrət Əmirov Konfrans-Konsert Mərkəzinin yaradılmasını Xəzər Universitetinin Azərbaycan mədəniyyətinə yeni töhfəsi kimi dəyərləndirdi. Sevil Əmirova çıxışında atasının xatirəsinə göstərilən ehtirama görə Xəzər Universitetinin rəhbərliyinə və iştirakçılara təşəkkürünü bildirdi.