2018-ci il mayın 28-dən iyunun 1-dək Xəzər Universiteti Təhsil fakültəsinin dekanı dosent Elza Səmədova, Keyfiyyətin Təminatı Mərkəzinin direktoru Lyudmila Sotova, İngilis dili və ədəbiyyatı departamentinin koordinatoru Kəmalə Əsgərova, İnkişaf Mərkəzinin layihə meneceri Ülkər Bayramova və Təhsil fakültəsinin koodrinatoru Qoşqar Məhərrəmov “Azərbaycan universitetlərində tədris və təlimin təkmilləşdirilməsi” adlı ERASMUS+ layihəsi çərçivəsində Finlandiyanın Jyväskylä Universitetində keçirilən silsilə seminarlarda iştirak etdilər.

Tədbirdə həm Azərbaycandan (Xəzər Universiteti, Naxçıvan Dövlət Universiteti, Gəncə Dövlət Universiteti, Sumqayıt Dövlət Universiteti, Bakı Slavyan Universiteti, Azərbaycan Dillər Universiteti, Azərbaycan Dövlət Pedaqoji Universiteti, Azərbaycan Universiteti), həm də Avropadan (Debrecen Universiteti –Macarıstan, Valensiya Politexnik Universiteti – İspaniya, Vyana Tətbiqi Elmlər Universiteti – Avstriya, Qazi Universiteti – Türkiyə) olan tərəfdaş universitetlərin 30-a yaxın nümayəndəsi iştirak etdirdi.

5 günlük seminarda iştirakçılar Jyväskylä Universiteti, universitetdə tədqiqat işləri, tədqiqat işlərinin elektron bazasının yaradılması, istifadəsi və hər kəsə əlçatan olması (Open access), Moodle sistemi haqqında geniş məlumatlar əldə etdilər və Moodle-dan istifadə etmək üçün keçirilən təlimlərdə iştirak etdilər.

Təlimlərin sonunda iştirakçılara sertifikatlar təqdim olundu.