2018-ci il mayın 18-də ABŞ-ın İllinois ştatının Çikaqo şəhərində həmin ştatda yaşayan “Azərbaycanlı Amerikalılar Cəmiyyəti”nin təşkilatçılığı ilə Şərqdə ilk demokratik respublika olan Azərbaycan Xalq Cümhuriyyətinin yaranmasının 100 illiyi münasibətilə geniş yubiley tədbiri keçirildi.

Cümhuriyyətin 100-cü ildönümünü qeyd etmək məqsədilə keçirilən möhtəşəm yubiley gecəsində Xəzər Universiteti Tarix və arxeologiya departamentinin müəllimi professor Nəsiman Yaqublu ilə yanaşı, İllinoisdəki Azərbaycan Cəmiyyətinin 200-dən çox fəalı, eləcə də, yaxın əyalətlərdən qonaq olan azərbaycanlılar iştirak edirdilər.

Yubiley gecəsində təşkilatçılar qonaqları salamladıqdan sonra bir sıra azərbaycanlı və amerikalı dövlət rəsmiləri, alimləri tərəfindən təbrik çıxışları səsləndirildi. Çıxışlarda Çikaqo meri George Van Dusen, Türkiyənin Çikaqodakı konsulu Umut Acar, Azərbaycan Cümhuriyyətinin qurucusu Məhəmməd Əmin Rəsulzadənin nəvəsi Rəis Rəsulzadə, Tomris Azəri, Dr. Adil Bağırov, professor Harry Lepinske və digər qonaqlar Azərbaycan haqda xatirələrini və təbriklərini qonaqlara çatdırdılar. Professor Nəsiman Yaqublu toplantı iştirakçılarına cümhuriyyətin tarixi haqqında geniş məlumat verdi.

Yubiley gecəsinə gələ bilməyən Amerika Birləşmiş Ştatları Dəniz Qüvvələrinin Komandiri vəzifəsində çalışan azərbaycanlı Naimi Amiral (John Amiral) və digərlərinin təbrik məktubları da oxundu. Gecənin musiqili hissəsində tanınmış tarzən professor Ramiz Quliyev, müğənnilər Lalə Məmmədova, Nuriyyə Hüseynova, Çinarə Məlikzadə və pianoçu Etibar Əsədli musiqi nömrələri ilə çıxış etdilər.

Tədbirdə iştirak edən qonaqlara təşkilatçılar tərəfindən cümhuriyyətin 100-cü ildönümü münasibətilə xüsusi olaraq hazırlanmış hədiyyələr də təqdim edildi. Tədbirin yüksək səviyyədə təşkili üçün İllinoisdə yaşayan Azərbaycan Cəmiyyətinin fəalları maliyyə dəstəyi göstərmişdilər.