2018-ci il iyunun 1-də Xəzər Universitetinin Mərmər salonunda 1-ci “Tək sağlamlıq: problemlər və onların həlli” mövzusunda beynəlxalq konfrans işə başladı.

Qeyd edək ki, konfrans haqqında hələ mayın 15-də Tək Sağlamlıq Komissiyasının (One Health Commission) media resurslarında xəbər yaymlanmışdı (http://myemail.constantcontact.com/One-Health-Happenings-News-Notes--May-2018.html?soid=1121110857318&aid=nGDIr9fIgws.

Məşhur universitetlərin, o cümlədən Xəzər Universitetinin də daxil olduğu Harvard Universitetinin Planetar Sağlamlıq İttifaqı (Planetary Health Alliance) isə Böyük Britaniyanın Edinburq Universitetində eyni vaxtda təşkil edəcəyi illik konfransını “Tərəfdaşlıq tədbiri” kimi elan etmişdi (https://planetaryhealthannualmeeting.org/satellite-meetings/). Bu ittifaq məşhur Rokfeller Fondu tərəfindən maliyyələşdirilən və dünyanın 95-dən çox universitet, dövlət təşkilatları və tədqiqat institutlarının daxil olduğu bir alyansdır.

Beynəlxalq konfransda Azərbaycan, Türkiyə, Rusiya, İran, Gürcüstan, ABŞ, Kanada və İsveçrədən sahənin 30 nəfərdən artıq görkəmli mütəxəssisi iştirak edir.

Konfransı giriş sözü ilə Xəzər Universitetinin Elmi işlər üzrə prorektoru dosent İradə Xəlilova açaraq, iştirakçıları salamladı və sözü universitetin təsisçisi, Direktorlar və Qəyyumlar Şurasının sədri professor Hamlet İsaxanlıya verdi. Professor Hamlet İsaxanlı çıxışında konfransda müzakirə olunacaq mövzunun beynəlxalq əhəmiyyətindən danışdı, konfransa uğurlu iş arzuladı.

Sonra proqram üzrə məruzələrin dinlənilməsinə başlandı. İyunun 2-də də işini davam etdirəcək konfransın bağlanış mərasimi həmin gün universitetin Mərmər salonunda olacaq.