17 may tarixində Xəzər Universitetinin Mədəniyyət Mərkəzində Fulbright təqaüdçüləri Wisconsin La-Crosse universitetindən dosent Robert Jecklin və Texas Tyler Universitetindən dosent Ali Azghani üçün qarşılama tədbiri keçirilmişdir.

Xəzər Universitetinin prorektoru dos. İradə Xəlilova qonaqları salamlayaraq təqaüdçülər, onların tədqiqat sahələri və bu sahədə əməkdaşlıq planları haqqında məlumat xarakterli çıxış etmişdir. O, hər iki təqaüdçü haqqında səmimi sözlərlə danışmışdır. Bundan sonra Xəzər Universitetinin təsisçisi, Direktorlar və Qəyyumlar Şurasının sədri prof. Hamlet İsaxanlı əməkdaşlıq tarixi haqqında, Azərbaycan və ABŞ universitetləri arasında Fulbright təqaüdçülərinin mübadiləsi tarixçəsindən söz açmışdır.

Qarşılama tədbirinin iştirakçıları Xəzər Universitetinin Rektoru Dr. Hassan Niknafs, Coğrafiya və Ətraf Mühit departamentinin müdiri Dr. Rövşən Abbasov və Məzunlarla İş şöbəsinin müdiri Baba Bayramlı təqaüdçüləri salamlayaraq onlara xoş sözlər ünvanlamış, Fulbright proqramı ilə məhsuldar əməkdaşlığa davam etmək istəklərini bildirmişlər.

Dos. Robert Jecklin və dos. Ali Azghani öz növbələrində Xəzər Universiteti əməkdaşlarına səmimi qarşılama və təqdidat üçün yaradılan şəraitə görə minnətdarlıqlarını bildirmişlər.

Xəzər Universiteti Orkestri tədbiri klassik musiqi ilə müşayiət etmişdir.