2018-ci il mayın 16-da Milli Azərbaycan Tarixi Muzeyində Cümhuriyyətin 100 illiyi münasibətilə keçirilən tədbir çərçivəsində Cümhuriyyətinin qurucularından biri, görkəmli dövlət xadimi Məhəmmədəmin Rəsulzadənin azərbaycanlı mühacir Süleyman Təkinərə mühacirət dövründə yazdığı və muzeyə hədiyyə olunmuş 29 məktubun təqdimatı keçirildi. Təqdimatda Xəzər Universiteti Tarix və arxeologiya departamentinin müdiri Roza xanım Arazova və tarix müəllimliyi ixtisasının tələbələri iştirak edirdilər.

Muzeyin elmi katibi t.ü.f.d. Fərhad Cabbarov tədbiri açaraq, qeyd etdi ki, məktublar 1950-1955-ci illər dövrünü əhatə edir. Məktublar muzeyə Süleyman Təkinərin Bakıda yaşayan varisləri tərəfindən hədiyyə olunmuşdur. Məktublarda M.Rəsulzadə Azərbaycan mühacirətinin qarşısında duran vəzifələr haqqında fikirlərini S.Təkinər ilə bölüşür. Daha sonra isə muzeyin xahişinə əsasən S.Təkinərin varisləri onları mədəniyyət ocağına hədiyyə etmişlər.

Tədbirdə “Əzablı yollarla” filmindən S.Təkinərin M.Rəsulzadə ilə görüşündən fraqmentlər göstərildi. Tədbirdə çıxış edən Muzeyin direktoru, akademik Nailə Vəlixanlı Cümhuriyyət irsinin, xüsusilə, M.Rəsulzadə mirasının qorunmasının əhəmiyyətini qeyd etdi. Daha sonra məktubları muzeyə hədiyyə edən Rauf Həsənov və S.Təkinərin Almaniyada yaşayan qızı Leyla Deqner çıxış etdilər.

Sonda Roza xanım və tarixçi tələbələr xatirə şəkli çəkdirdilər.