2018-ci il mayın 4-dən 10-dək Türkiyədə Boğaziçi Universitetinin Mühəndislik Cəmiyyəti tərəfindən hər il təşkil edilən ICAMES (Mühəndislik Tələbələrinin Beynəlxalq Mədəniyyət və Akademik Görüşü) görüşünün 23-cüsü keçirildi. Tədbirdə Türkiyə, Misir, İtaliya, Kanada, Kolumbiya, Banqladeş, İordaniya və Makedoniyadan müxtəlif komandalar iştirak edirdi. Builki tədbirdə Azərbaycanı Xəzər Universiteti Mühəndislik və Tətbiqi elmlər fakültəsi Elektronika və telekommunikasiya departamentinin müdiri Nuru Səfərovun rəhbərliyi altında həmin fakültənin 5 nəfər tələbəsi (Tərlan Həsənli, Lətif Quliyev, Hüseyn Əskərov, Beydulla Zeynalov və Əlikram Həsənli) təmsil edirdi.

ICAMES beynəlxalq mühəndislik layihəsi yarışmasıdır. Yarışmada iştirak etmək üçün yeganə şərt, mühəndislik ilə əlaqəli və bakalavr tələbələri tərəfindən hazırlanan lahiyə təqdim etməkdir. ICAMES-in builki mövzusu “Bərpa olunan enerji” haqqında lahiyə təqdim etmək idi.

Xəzər Universitetinin komandası bu yarışmaya 2-ci dəfə qatılmışdı. Bu yarışmada onlar “Piezoelektrik enerjinin alınması” mövzusunda təqdimat keçirdilər. Bu lahiyənin tətbiq üsulları və gələcəklə bağlı planlaşdırılan layihələr barədə iştirakçılara geniş məlumat verildi.

Tədbirdə, həmçinin, Azərbaycanın və Xəzər Universitetinin tanıdılması məqsədilə müxtəlif addımlar da atılmışdır. “Mədəniyyət gecəsi” adlanan hissədə Azərbaycanın müxtəlif şirniyyat və içkiləri digər iştirakçılara təqdim olunaraq, ölkə barədə iştirakçılara geniş məlumat verildi.