2018-ci il mayın 2-dən 12-dək Xəzər Universitetinin layihə rəhbəri və Əlilliyi olan Tələbələr üçün Mərkəzin koordinatoru Rima Məmmədova ABŞ Konqresinin maliyyə dəstəyi ilə həyata keçirilən Azərbaycanda ABŞ səfirliyinin idarə etdiyi Əlilliyin Müdafiəsi və İslahatlar üçün Açıq Dünya (Open World Program for Disability Advocacy and Reform) adlı mübadilə proqramı çərçivəsində Amerika Birləşmiş Ştatlarında işgüzar səfərdə oldu. Səfər iki hissədən ibarət idi. Səfərin birinci hissəsi 2018-ci il mayın 2-si və 3-də Vaşinqton şəhərində baş tutdu. Öncə keçmiş səfir və “Açıq Dünya”nın Qəyyumlar Şurasının icraçı direktoru Con O’Kif (John O’Keefe) Azərbaycan və Kosovandan olan nümayəndələri salamladı və “Açıq Dünya” Liderlik Mərkəzi (Open World Leadership Center) haqqında geniş məlumat verdi. Daha sonra Amerika Universitetinin müəllimi Dr. Ceyms Kirk (James M.Quirk) Amerika Federalizmi haqqında məruzə oxudu və Amerikanın siyası sistemi haqqında geniş məlumat verdi. Daha sonra Georgetown Universitetinin müəllimi Dr. Sem Potoliçio (Sam Potolicchio) “Dünya liderlərinin hazırlanması” adlı mühazirə oxudu. Birinci hissənin sonu Vaşinqton şəhərinin gəzintisi ilə başa çatdı.

Səfərin ikinci hissəsi Şimali Nevada Beynəlxalq Mərkəzinin təşkilatçılığı ilə ABŞ-ın Nevada ştatının Rino (Reno) şəhərində 04-10 may tarixlərində baş tutdu. Azərbaycandan olan nümayəndələr Rino və Karson (Carson) şəhərlərində əlilliyi olan şəxslər üçün yaradılmış şəraitlə tanış oldular və onların hüquqlarını müdafiə edən və sosial şəraitlə təmin edən dövlət və qeyri-hökumət təşkilatları ilə tanış oldular. Səfər zamanı Nevada Əlilliyin qorunması və Hüquq Mərkəzi, (Nevada Disability Advocacy and Law Center), Əlillikdə Mükəmməllik üçün Nevada Mərkəzi (Nevada Center for Excellence in Disabilities), Nevada Universitetinin Əlilliyi olan şəxslər üçün Resurs Mərkəzində (Disability Resource Center) və s. təşkilatların və mərkəzlərin fəaliyyətləri ilə tanış olundu, Azərbaycanda əlilliyi olan şəxslərin hüquqlarının qorunması üçün həyata keçirilən fəaliyyətlər haqqında məlumat verildi. Rima Məmmədova Azərbaycanda yaradılmış və Xəzər Universitetində fəaliyyət göstərən ilk Əlilliyi olan Tələbələr üçün Mərkəz haqqında həmkarlarına geniş məlumat verdi və gələcək əməkdaşlığa dəvət etdi.

Nümayəndələr, həçminin, ABŞ Konqresinin üzvü olan Mark Amodinin (Mark Amodei) Rino şəhərində fəaliyyət göstərən ofisinin əməkdaşları ilə görüşdülər. Görüş zamanı Rima Məmmədova konqresin mükafatı (sertifikat) ilə təltif olundu.

Səfər zamanı Nevada ştatında yerləşən Taho gölünə (Lake Tahoe) gəzinti təşkil olundu.