Mayın 11-də Fövqəladə Hallar Nazirliyi (FHN) işçilərinin həmkarlar ittifaqının təşkilatçılığı ilə Ağdam rayon mədəniyyət evində ulu öndər Heydər Əliyevin anadan olmasının 95-ci ildönümünə həsr edilmiş “Ümummilli lider Heydər Əliyev və Dağlıq Qarabağ” mövzusunda konfrans keçirilib.
FHN işçilərinin həmkarlar ittifaqının sədri Mehman İsmayılov tədbiri açaraq ümummilli lider Heydər Əliyevin keçdiyi şərəfli və mənalı həyat yoluna tarixi-xronoloji nəzər salıb, dahi şəxsiyyətin Azərbaycana rəhbərlik etdiyi 34 illik dövrdə gördüyü işlərin əhəmiyyətindən danışıb.
Fövqəladə Hallar Nazirliyi Qarabağ Regional Mərkəzinin rəisi, polkovnik Mirəli Feyziyev, Ağdam Rayon İcra Hakimiyyətinin başçısı Raqub Məmmədov çıxışlarında Azərbaycan xalqının böyük oğlunun dövlətçiliyimizin möhkəmləndirilməsi, Qarabağın milli-mədəni sərvətlərinin mühafizəsi ilə bağlı həyata keçirdiyi tarixi tədbirlərdən söz açıb, Ermənistan-Azərbaycan, Dağlıq Qarabağ münaqişəsinin ədalətli həlli üçün göstərdiyi əvəzsiz xidmətlərdən söz açıblar.
Sonra tədbir konsert proqramı ilə davam edib. Konsert proqramında Xəzər Universitetinin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın bədii rəhbərliyi və gənc istedadlı musiqiçi Cavad Tağızadənin dirijorluğu, solistlər – Xəzər universitetinin müəllimi Məhsəti Cabbarova və Atəş Qarayevin iştirakı ilə universitetin Kamera orkestrinin ifasında Azərbaycan bəstəkarlarının əsərləri dinlənilib.